काठमाडौं (हाम्रो खेलकुद) – आइसीसी महिला विश्व टी–२० एसिया छनोट प्रतियोगितामा नेपाल र थाइल्यान्डले अंक बाँडेका छन् । थाइल्यान्डको टेडथाई क्रिकेट मैदानमा भएको खेल वर्षाले अवरुद्ध बनेपछि दुवै टिमले १–१ अंक बाँडेका हुन् ।

थाइल्यान्डले दिएको ९१ रनको लक्ष्य पछ्याएको नेपालले ३.४ ओभरमा बिना विकेटको क्षतिमा १० रन जोड्दा खेल वर्षाले अवरुद्ध भएको थियो । त्यसपछि खेल शुरु हुन नसक्दा दुवै टोली अंक बाड्न बाध्य भएका हुन् । नेपालकी ज्योति पाण्डेले ४ र सरिता मगरले ५ रन बनाएर खेलिरहेका थिए ।

टस जितेको नेपालले फिल्डिङ गर्ने निर्णय गरेपछि थाइल्यान्डले २० ओभरमा ६ विकेटको क्षतिमा ९० रन बनायो । घरेलु टिमका लागि नारुमोल चाइवाईले नटआउट २३ रन जोडिन् । उनको ३७ बलको पारीमा कुनै बाउन्ड्री भने थिएन ।

त्यस्तै ओपनर नाटाकम चन्तमले १८ रन जोडिन् । नेपालकी सरिता मगरबाट बोल्ड हुनुअघि उनले १८ बल खेलेर २ चौका प्रहार गरिन् । स्वर्णा्रिन टिपोचले १५ रनको योगदान गरिन् ।

बलिङतर्फ नेपालका लागि सरिता मगरले २ विकेट लिइन् । कप्तान रुबिना क्षेत्री र करुणा भण्डारीले १–१ विकेट हात पारे । सोमबार भएको अन्य खेलमा हङकङले मलेसियालाई ३५ रन तथा युएइले चीनलाई १६ रनले पराजित गर्‍यो ।

राउन्ड रोविनको आधारमा हुने लिगको शीर्ष २ टोली नेदरल्यान्ड्समा हुने विश्व महिला टी–२० छनोट प्रतियोगिताका लागि छानिने छन् । छनोट प्रतियोगितामा ८ टिमबीच प्रतिस्पर्धा हुनेछ ।

नेपालका बाँकी खेल

५ मंसिर – हङकङविरुद्ध

७ मंसिर – युएईविरुद्ध

८ मंसिर – मलेसियाविरुद्ध

१० मंसिर – चीनविरुद्ध