क्वालालम्पुर (एजेन्सी)– अफगानिस्तानले एसीसी यू १९ एसिया कप क्रिकेटको उपाधि जितेको छ । मलेसियाको क्वालालम्पुरमा आज भएको फाइनलमा पाकिस्तानलाई १ सय ८५ रनको भारी अन्तरले हराउँदै अफगानिस्तानले उपाधि जितेको हो ।

पाकिस्तानले टस जितेर अफगानिस्तानलाई पहिले ब्याटिङको निम्तो दिएको थियो । त्यसको भरपुर फाइदा उठाउँदै अफगानिस्तानले निर्धारित ५० ओभरमा ७ विकेट गुमाउँदै २ सय ४८ रन जोडेको थियो । जवाफमा पाकिस्तानी टोली २२.१ ओभरमा ६३ रन बनाउँदै अलआउट भएको थियो । अफगानिस्तानका मुजिव जार्डन र कइस अहमदले पाकिस्तानी ब्याटिङ ध्वस्त पारेका थिए ।

मजिदले १३ रन खर्चेर ५ विकेट लिए भने कइसले १८ को बदलामा ३ विकेट हात पारेका थिए । प्रतियोगिता भर मुजिबको दबदबा रह्यो । उनले प्रतियोगितामा दुई पटक ५ वा त्यो भन्दा बढी विकेट लिए । त्यसअघि समूह चरणमा पनि पाकिस्तानविरुद्धको खेलमा मुजिदले २३ रन खर्चेर ६ विकेट लिएका थिए । त्यो खेलमा पनि पाकिस्तान ५७ रनले पराजित भएको थियो । मुजिवनै प्रतियोगिताको प्लेयर अफ दी टुर्नामेन्ट घोषित भए ।

त्यसअघि अफगानिस्तानका लागि इ कीले शतक बनाएका थिए । उनले अविजित १ सय ७ रन बनाएका थिए । त्यस्तै आर गुरबाजले ४० र जार्डनले ३६ रन बनाएका थिए । पाकिस्तानका लागि एम मुसाले ३ विकेट लिएका थिए । समूह चरणमा अफगानिस्तानले श्रीलंकाविरुद्धको खेल भने गुमाएको थियो । लिग चरणका तीन मध्ये २ खेल जितेको अफगानिस्तानले सेमिफाइनलमा नेपाललाई ७ विकेटले हराएको थियो ।