काठमाडौं (हाम्रो खेलकुद)– चितवन टाइगर्सले ट्यालेन्ट हन्टमार्फत एक खेलाडी खेलाडी छनोट गरेको छ । चितवन जिल्ला क्रिकेट संघको सहकार्यमा बिहीबार भएको ट्यालेन्ट हन्टबाट ब्याट्सम्यान आकाश थापा छनोट भएका छन् । चितवन टाइगर्स अर्को महिना सुरु हुने एभरेष्ट प्रिमियर लिग (इपिएल) को सहभागी ६ टोली मध्येको एक टोली हो ।

सहभागी हरेक टोलीले स्थानिय खेलाडीलाई समावेश गराउने पर्ने प्रावधान अनुसार ट्यालेन्ट हन्ट राखिएको हो । नारायणगढस्थित क्याम्पाचौरमा भएको ट्यालेन्ट हन्टमा ३० खेलाडीको सहभागिता रहेको चितवन क्रिकेट संघका अध्यक्ष कैलाश प्रधानले जानकारी दिए । राष्ट्रिय टोलीका पूर्व कप्तान राजु खड्का, पूर्व क्रिकेट खेलाडी दीपेन्द्र चौधरीले खेलाडी छनोट गरेका थिए ।

सहभागीमध्येबाट हेमन्त कुमार थापा क्षत्री, गौतम, संघर्ष, दिवस पौडेल र आशा पाँच जना पहिलो चरणमा छनोट भएका थिए । त्यसमध्येबाट आकाश अन्तिम छनोटमा परेका हुन् । चितवन टाइगर्समा अहिले सम्म ११ खेलाडी आबद्ध भइसकेका छन् ।

सहभागी हरेक टोलीले तीन जना विदेशी खेलााडी राख्न पाउने प्रावधान रहेको र आफुहरु खेलाडी अनुबन्धनको नजिक रहेको चितवन टाइगर्सका मालिक नवलपरासी निवासी किशोर भट्टराईले जानकारी दिए ।

टोलीमा सुवास खकुरेल, पृथु बास्कोटा, , दीपेन्द्र सिंह ऐरी, ललित भण्डारी, सहाब आलम आबद्ध छन् । ट्यालेन्ट हन्टबाट पहिलो चरणको छनोटमा परेका तीब्रगतिका बलर गौतमलाई पनि राइजिङ प्लेयरका रुपमा टोलीमा राख्ने भट्राईले जानकारी दिए ।