काठमाडौं (हाम्रो खेलकुद) – नेपालले भारतविरुद्ध ऐतिहासिक जित हात पार्दै हिजो आफूलाई मलेसियामा जारी एससी यू १९ एसिया कप क्रिकेटमा  बचाइराखेको थियो । तर आज बंगलादेशले मलेसियालाई हराएकाले नेपालको सम्भावना अलि कठिन भएको छ ।

बंगलादेशले मलेसियालाई २ सय६२ रनको भारि अन्तरले हराएको कारण नेपालले पनि छनोट हुन मलेसियालाई ठूलो अन्तरले हराउनै पर्ने हुन्छ र बंगलादेशले भारतसँग जित मात्र निकाले पुग्छ । दोस्रो स्थिति भने नेट रन रेटमा आधारित छ जहाँँ भारतले पनि बंगलादेशलाई भारी अन्तरले हराउन पर्ने हुन्छ । समूहमा बंगलादेशले २ खेल जितेको छ भने नेपाल र भारतले समान १ खेल जितेका छन् । आयोजक मलेसियाले दुवै खेल हारिसकेको छ ।

प्रशिक्षक विनोद दास:

यो हाम्रो लागि छनोट खेल जस्तै हो । हाम्रो मुख्य लक्ष्य राम्रो प्रदर्शन गर्दै ठूलो जित निकाल्ने हुने छ । तर हामी अन्य खेलमा पनि भर पर्नु पर्ने हुँदा पहिलो पारी सकेर फेरी छनोटको स्थितिको मुल्याङ्कन गर्ने छौँ । पहिलो खेल हारे पनि यो स्थितिमा उभिनु भनेको सकारात्मक कुरा नै हो । अब भोलि ठूलो जित हात पार्दै अरु देशलाई बलियो सन्देश दिन चाहन्छौँ ।

कप्तान दिपेन्द्र ऐरी:

जित्नुबाहेक अरु विकल्प छैन । बंगलादेशले मलेसियालाई जित्यो भनेपछि हाम्रो सम्भावना अझै कठिन भएको छ । पहिले ब्याटिङ गरे ठूलो स्कोर बनाउने र पहिले बलिङ गरे मलेसियालाई कम स्कोरमा रोक्ने हाम्रो लक्ष्य हुने छ । भारत र बंगलादेशको नतिजाले प्रभाव पारे पनि हामीले हाम्रो ‘बेस्ट’ दिने छौँ । भारत विरुद्धको जितले आत्मबल पनि बढेकोले सेमिफाइनल पुग्नेमा हामी आशावादी छौँ ।