काठमाडौं (हाम्रो खेलकुद)– नेपालले आज बंगलादेशको सामना गर्दै मलेसियामा हिजो सुरु भएको एसीसी यू १९ एसिया कपमा आफ्नो यात्रा प्रारम्भ गर्दैछ । खेल नेपाली समय अनुसार बिहान ७ः१५ बजे सुरु हुनेछ ।

बंगलादेश त्यहि टोली हो, जो सँग नेपालले उसकै भूमिमा पुगेर अन्तिम तयारी गरेको थियो । तीन अभ्यास खेलमध्ये सुरुआती २ खेल हारेको नेपालले अन्तिम खेल भने जितेको थियो । अन्तिम खेल ६ विकेटले जित्नुअघि नेपाल ३ विकेट र १ सय २३ रनले पराजित भएको थियो ।

त्यो भ्रमणले नेपाली टोलीको मनोबल उच्च रहेको मलेसिया जानुअघि टोलीका मुख्य प्रशिक्षक विनोद दासले बताएका थिए । उनले आज हुने खेलमा पनि योजना अनुसार कार्यान्वयन गर्न सके बंगलादेश सामू चुनौति पेश गर्न सक्ने बताएका छन् ।

‘पहिलो खेल महत्वपूर्ण हुन्छ । सुरुआत राम्रो दिलाउन पनि पहिलो खेल जित्नु पर्ने हुन्छ ’ उनले भने, ‘अन्तिम खेल जितेकोले यहाँको खेलमा त्यसको प्रभाव हुन सक्दछ । त्यसैले योजना अनुसार खेल्दा चुनौति दिन सकिन्छ ।’

प्रशिक्षक दासले मलेसियाको मौसमको भर गर्न नसकिने बताए । ‘यहाँको मौसम अनुमान गर्न सकिन्न । हाम्रो खेलाडीलाई पनि त्यो जानकार छन् ’ उनले थपे, ‘ तर खेल सजिलो भने पक्कै हुने छैन ।’ दासले टोलीको ब्याटिङमा सुधार भइरहेको सुनाए । उनले थपे, ‘हामी सहि बाटोमा छौं । आशा गरौं त्यहि उच्च प्रदर्शनलाई निरन्तरता दिने आशा राखौं । ’

पहिलो दिन हिजो भारत, अफगानिस्तान र श्रीलंका विजयी भएका छन् । नेपाल रहेको समूह एमा भारतले आयोजक मलेसियालाई २ सय २ रनको फराकिलो अन्तरले हरायो । अर्को समूहमा अफगानिस्तानले पाकिस्तानलाई र श्रलिंकाले संयुक्त अरब इमिरेट्स (युएई) लाई समान ७ विकेटले हराएको थियो ।