काठमाडौं (हाम्रो खेलकुद)– मलेसियामा एसीसी यू १९ एसिया कप शुक्रबार सुरु हुँदैछ । नेपालले शनिबार बंगलादेशविरुद्ध खेल्दै एसीसी यू १९ एसिया कपको सुरुआत गर्दैछ । नेपाल र बंगलादेश दुवैले एकअर्कासँग तीनवटा अभ्यास खेल खेल्दै एसिया कपको तयारी गरेका थिए । गत साता खेलका तीन अभ्यास खेल मध्ये दुईमा बंगलादेश र अन्तिम खेलमा नेपाल विजयी भएको थियो ।

आज भएको प्रि म्याच कन्फ्रेन्समा नेपाली युवा टोलीका कप्तान दीपेन्द्र सिंह ऐरीले एसिया कपको लागि नेपाली टोलीको तयार राम्रो भएको बताएका छन् । ‘बंगलादेशसँगको अभ्यास खेलको श्रृखंलाले हाम्रो तयारी उत्कृष्ट भएको छ,’ उनले आशा गरे,‘हामी पछिल्लो खेलको प्रदर्शनलाई यहाँ दोहोराउन चाहन्छौं ।’

बंगलादेशका कप्तान मोहम्मद सैफ हसनले तयारी सन्तोषजनक रहेको उल्लेख गरे । उनले भने, ‘नेपालले अभ्यासमा निकै राम्रो खेल्यो र त्यसमध्ये एउटा जित्यो पनि । हामी पनि जितका साथ अघि बढ्न चाहन्छौं ।’

नेपाल र बंगलादेशसँगै समूह ‘ए’ मा तीन पटकको च्याम्पियन भारत र आयोजक मलेसिया रहेका छन् । मलेसियाका कप्तान भिरनदीप सिंहले भने , ‘युवाहरुका लागि एसीस्ले यो राम्रो अवसर जुटाएको छ । हामी उत्कृष्ट नजिताको अपेक्षासहित प्रतियोगितामा खेल्दैछौं ।’

भारतीय कप्तान हिमांशु रानाले यो उमेर समूहको कुनै पनि फाइनलमा पराजित हुन नपरेको स्मरण गर्दै त्यसकै निरन्तरताको अपैषा राखेका छन् । उनले पाकिस्तान र श्रीलंका पनि त्यत्तिकै बलियो रहेको बताए ।

पहिलो दिन भारत र मलेसिया, पाकिस्तान र अफगानिस्तान तथा श्रीलंका र युएईबीच प्रतिस्पर्धा हुनेछ ।