थिरुवनन्तपुरम (एजेन्सी)– भारतले न्युजिल्यान्डविरुद्धको तीन टि ट्वान्टी क्रिकेट श्रृखंला जितेको छ । वर्षाले प्रभावित तेस्रो तथा निर्णायक टि ट्वान्टीमा आज न्युजिल्यान्डलाई ६ रनले हराउँदै भारतले उपाधि जितेको हो । सन् २०१५ को अक्टुबर यता भारतले घरेलु मैदानमा क्रिकेटको कुनै श्रृखंला गुमाएको छैन । टि ट्वान्टीअघि तीन एक दिवसिय श्रृखंलामा पनि भारतले न्युजिल्यान्डलाई २–१ ले हराएको थियो ।

आजको खेलमा टस जितेर न्युजिल्यान्डले फिल्डिङ रोजेको थियो । ८ ओभरमा घटाइएको खेलमा भारतले पहिले ब्याटिङ गर्दै ६ विकेटको क्षतिमा ६७ रन बनाएको थियो । जवाफमा न्युजिल्यान्डले ६ विकेटको नोक्सानीमा ६१ रन मात्र बनाउन सक्यो ।

भारतका लागि जस्पित बुम्रहाले २ तथा भुवनेश्वर कुमार र कुलदिप यादवले समान १ विकेट लिए । न्युजिल्यान्डका लागि कोलिन डी ग्रान्डहोमले सर्वाधिक १७ रन जोडेपनि जित दिलाउन सकेनन् । ग्लिन फिलिप्सले ११ रन जोडे भने बाँकी कुनै ब्याट्सम्यानले दोहोरो आँकडामा रन बनाउन सकेनन् ।

त्यसअघि भारतका लागि मनीष पाण्डेले १७, हार्दिक पाण्डेयले अविजित १४ र कप्तान विराट कोहलीले १३ रन जोडेका थिए । न्युजिल्यान्डका टिम साउथी, इस सोधीले समान २ र ट्रेन्ट बोल्टले १ विकेट लिएका थिए ।