केराला (एजेन्सी) – घरेलु टोली भारतले आज तेस्रो तथा निर्णायक टि-ट्वेन्टि खेलमा न्युजिल्यान्डको सामना गर्ने छ । थिरुभनान्थापुरमको ग्रिनफिल्ड अन्तर्राष्ट्रिय रङ्गशालामा खेलिने सो खेल नेपाली समय अनुसार ७.१५ बजे सुरु हुने छ ।

भारतले पहिलो खेल ५३ रनले जितेको थियो भने भ्रमणकारी टोली न्युजिल्यान्डले दोस्रो खेल ४० रनले जित्दै तीन खेलको श्रृंखला १-१ बनाएको थियो । त्यसैले आजको खेलको नतिजाले श्रृंखलाको निर्णय पनि गर्ने छ ।

भारतका पूर्व कप्तान महेन्द्र सिंह धोनीले आफ्नो स्तरको प्रदर्शन नगरेको भन्ने आलोचना पाउँदा उनले खेल्ने-नखेल्ने अथवा खेले पनि कुन नम्बरमा ब्याटिङ गर्ने छन् भन्ने स्पष्ट छैन ।

भारतका बलरद्वय जस्प्रित बुम्राह र भुवनेश्वोर कुमारले पछिल्लो खेलमा अन्तिमतिर राम्रो बलिङ गरे पनि पहिलो खेल खेलिरहेका मोहम्मद सिरजले भने खासै राम्रो प्रदर्शन गर्न सकेका थिएनन् । त्यसैले सिरजको आज टोलीमा स्थान अनिश्चित रहेको छ ।

पछिल्लो खेलमा भ्रमणीय टोलीका लागि बलर ट्रेन्ट बोल्टले निकै राम्रो प्रदर्शन गरेका थिए । यस खेलमा पनि भारतलाई खुलेर रन बटुल्न नदिन र सुरुवातमै विकेट लिएर दबाबमा राख्न बोल्टको ठूलो भूमिका हुने छ ।