काठमाडौं (हाम्रो खेलकुद) –  बंगलादेश भ्रमणमा रहेको नेपाली युवा क्रिकेट टोलीले तेस्रो अभ्यासखेल आज जितेको छ । नेपालले घरेलु टोलीमाथि ६ विकेटको जित दर्ता गरेको हो । नेपाल र बंगलादेश दुवै कात्तिक २३ गते मलेसियामा सुरु हुने एसीसी यू १९ एसिया कपको अन्तिम तयारीमा जुटेका छन् ।

नेपालले यसअघिका दुई खेल ३ विकेट र १ सय २३ रनले गुमाएको थियो । आज बंगलादेशले दिएको २ सय २६ रनको लक्ष्य नेपाली टोलीले ४६.३ ओभरमा ४ विकेट गुमाएर पूरा ग¥यो । टोलीका लागि आसिफ शेखले अर्धतक पुरा गरे । आसिफले ९० रन जोडे । ८८ बल खेलेका उनले ९ चौका र ३ छक्का प्रहार गरे ।

पहिलो विकेटका लागि आसिफले जितेन्द्र सिंहसँग १ सय ३९ रनको साझेदारी गरेका थिए । जितेन्द्र ४५ रन बनाए । रोहित कुमार पौडेलले २५ र अनिल कुमार शाहले पनि १५ रन जोडे । त्यस्तै कप्तान दिपेन्द्र सिंह ऐरी २७ र भिम सार्की १३ रनमा अविजित रहे । बंगलादेशका रोनी हुसेन, काजी अनिक इस्लाम, शाखावात हुसेन र सैफ हसनले समान १ विकेट लिए ।

त्यसअघि पहिले ब्याटिङ गरेको बंगलादेशले अमिनुल स्लामको अर्धशतक तथा महमद रकिबको बिष्फोटक ब्याटिङमा बंगलादेशले ५० ओभरमा ७ विकेट गुमाउँदै २ सय २५ रन बनाएको थियो । मध्यक्रमका अनिमुलले ८० रन बना । रकिबले ६ चौका र १ छक्काको मद्दतमा ३९ रन जोडे । रोशिउल हक २१ रनमा अविजित रहे ।

सोजिब होसेन ६, पिनाक घोष २३, कप्तान सैफ हसन १७, अफिफ होसेन १८ रन बनाएर आउट भए । नेपालका लागि शाहब आलमले ३ विकेट लिए । अनिल कुमार शाहले २ तथा कप्तान दिपेन्द्रले १ विकेट लिए ।

एसिया कपमा नेपाल र बंगलादेश एउटै समूहमा छन् । बंगलादेशसँग कात्तिक २५ गते खेल्दै नेपालले एसिया कपको सुरुआत गर्नेछ । समूह ‘ए’ मा नेपाल, बंगालदेशसहित भारत र आयोजक मलेसिया रहेका छन् ।

नेपालको दोस्रो खेल कार्तिक २६ गते भारतसँग खेल्नेछ । समूह चरणको अन्तिम खेल कार्तिक २८ गते नेपालले आयोजक मलेसियाको सामना गर्नेछ । भारत तीन पटकको एसिया कप च्याम्पियन हो ।