काठमाडौं (हाम्रो खेलकुद) – यू १९ को दोस्रो अभ्यास खेलमा नेपालले २ सय २८ रनको लक्ष्य पाएको छ । पहिले ब्याटिङ गरेको बंगलादेशले दुई खेलाडीको अर्धशतकसँगै निर्धारित ५० ओभरमा ८ विकेट गुमाएर २ सय २७ रन बनाएको थियो । जवाफमा ब्याटिङ गरेको नेपालको सुरुआत खराब भएको छ ।

यो समाचार तयार पर्दा सम्म नेपालले १५ ओभरमा ५ विकेट गुमाएर ३८ रन मात्र जोड्न सकेको छ । सन्दीप सुनान (३), आसिफ सेख (९), अनिल शाह (३), कप्तान दीपेन्द्र (०), रोहित पौडेल (९) आउट भइसकेका छन् ।

यसअघि घरेलु टोलीका लागि सैफ सहन र अफिफ हुसुनेले अर्धशक पुरा गरेका थिए । सैले ६२ र रनआउट हुनुअघि अफिफले ५९ रन बनाएका थिए । तोविद हृडेलले २९, ओपनर नइम सेखले २६ र सकिल हुनेले १४ रन बनाए भने अन्य ब्याट्सम्यानले दोहोरो अंकमा रन बनाउन सकेनन् । नेपालका लागि सन्दीप लामिछाने र कप्तान दीपेन्द्रसिंह ऐरीले समान २ विकेट लिए ।

बिहिबारको पहिलो अभ्यास खेलमा नेपाल ३ विकेटले पराजित भएको थियो । त्यो खेलमा नेपालले दिएको १ सय ५४ रनको लक्ष्य बंगलादेशले ३९ ओभरमा ७ विकेट गुमाएर पुरा गरेको थियो । नेपाल र बंगलादेशको युवा टोली मलेसियामा कात्तिक २३ गते देखि सुरु हुने एसिया कपको अन्तिम तयारीका जुटेका छन् ।

एसिया कपमा नेपाल र बंगलादेश एउटै समूहमा छन् । बंगलादेशसँग कात्तिक २५ गते खेल्दै नेपालले एसिया कपको सुरुआत गर्नेछ । समूह ‘ए’ मा नेपाल, बंगालदेशसहित भारत र आयोजक मलेसिया रहेका छन् ।