काठमाडौं (हाम्रो खेलकुद) – एसीसी यू–१९ एसिया कपको तयारीमा रहेको नेपाली युवा टोली बंगलादेशसँगको पहिलो अभ्यास खेलमा आज पराजित भएको छ । क्रिरा शिखा प्रतिष्ठान (बिकेएसपी) मैदानमा बिहिबार नेपाली यु–१९ टोलीले ३ विकेटले पराजित भएको हो । नेपालले दिएको १ सय ५४ रनको लक्ष्य बंगलादेशले ३९ ओभरमा ७ विकेट गुमाएर पुरा गरेको थियो ।

घरेलु टोलीलाई जित दिलाउन ओपनर नइम सेखले अर्धशतक पुरा गरे । उनले सर्वाधिक ५३ रन जोडे । टाउहिड हिड्रलीले अविजित ४८ रन तथा काजी अनिकले १८ र पिनक घोसले १४ रन जोडे । नेपालका सन्दिप लामिछानेले ४ विकेट लिएपनि जित दिलाउन सकेनन् । त्यस्तै नेपालका साहब आलम र पवन सरार्फले समान १ विकेट लिए ।

त्यसअघि टस हारेर पहिले ब्याटिङ गरेको नेपालले ५० ओभरमा ९ विकेट गुमाएर १ सय ५३ रन बनाएको थियो । नेपालका आसिफ सेखले सर्वाधिक ३२ रन जोडे । त्यस्तै भिम सार्कीले २८, पवन सरार्फले १९, अनिलकुमार साहले १८, कमलसिंह ऐरीले १७ तथा कप्तान दीपेन्द्र सिंह ऐरीले १६ रन जोडे ।

बंगलादेशका हसन मुहम्मद र काजी अनिक इस्लामले समान ३ तथा नयन हसनले २ विकेट लिए । नेपालले अझै दुईवटा अभ्यास खेल खेल्नेछ । मलेसियामा अभ्यास खेल खेल्न बाँकी छ । मलेसियामा कात्तिक २३ गते देखि सुरु हुने एसिया कपको अन्तिम तयारीका लागि नेपाली टोली बंगलादेश भ्रमणमा गएको हो ।