ब्लुमफोन्टिन (एजेन्सी)– दक्षिण अफ्रिकाले पहिलो टि ट्वान्टी क्रिकेटमा बंगलादेशलाई २० रनले हराएको छ । १ सय ९६ रनको लक्ष्य पछ्याएको भ्रमणकारी टोलीले ९ विकेटको क्षेतिमा १ सय ७५ रन मात्र जोड्न सक्यो । त्यसअघि टस जितेर ब्याटिङ गरेको दक्षिण अफ्रिकाले ४ विकेट गुमाउँदै १ सय ९५ रन बनाएको थियो ।

अलराउन्डर एन्डिले फेलुकवायोले महत्वपूर्ण विकेट लिएपछि बंगलादेश लक्ष्यमा पुग्न असफल भएको थियो । ओपनर सौम्य सकारलाई फेलुकवायोले ४७ रनमा एलबिडब्लू आउट गरेपछि बंगलादेश कमजोर बनेको थियो । ‘हामीलाई थाहा थियो उनीहरु आक्रमक ढंगले प्रस्तुत हुन्छन् भन्ने,’ दक्षिण अफ्रिकी कप्तान जेपी डुमिनीले भने, ‘तर हाम्रा खेलाडीले आफ्नो क्षमता अनुसारको प्रदर्शन गरे र उनीहरुलाई रोके ।’

सरकार र इम्रुल कायसले पहिलो विकेटका लागि २५ बलमा ४३ रनको बनाउँदै बंगलादेशलाई उत्कृष्ट सुरुआत दिलाएका थिए । दुई विकेट खस्दा सम्म पनि बंगलादेशले खेल जित्ने सम्भावना थियो । २ विकेटको क्षतिमा बंगलादेशले ९२ रन जोडिसकेको थियो ।

तर, फेकुलवायोले १० औं ओभरको पहिलो बलमा सरकारको विकेट लिएपनि बंगलादेश धारासायी भएको थियो । ३१ बलमा ५ चौका र २ छक्का प्रहार गरेका सरकारलाई सुरुमा आउट दिइएको थिएन र तर रिभ्युमा उनी आउट भए । फेकुलवायोले महमुदुल्लाको विकेट पनि लिएका थिए ।

त्यसअघि दक्षिण अफ्रिकाका लागि दुई वटा महत्वपूर्ण साझेदारी भएका थिए । क्विन्टन डी कक र म्यान अफ दी म्याच एबी डि भिलियर्सले दोस्रो विकेटका लागि ५१ बलमा ७९ रनको साझेदारी गरेका थिए ।

ककले ५९ रन बनाए भने भिलियर्सले मात्र २७ बलमा ४९ रन जोडे । त्यस्तै फरान बेहार्डिन र डेभिड मिलरले अन्तिम ५ ओभरमा अविजित ६२ रनको साझेदारी गरेका थिए । बेहार्डिन ३६ र मिलर २५ रनमा अविजित रहेका थिए ।