दक्षिण अफ्रिका (एजेन्सी)– दक्षिण अफ्रिकाले तेस्रो तथा अन्तिम एक दिवसिय क्रिकेटमा हिजो बंगलादेशलाई २ सय रनले हराएको छ । योसँगै घरलु टोलीले एक दिवसिय श्रृखंला ३–० ले आफ्नो पक्षमा पारेको छ ।

पहिलो ब्याटिङ गरेको दक्षिण अफ्रिकाले ३ सय ६९ रन बनाएको थियो । यो बंगलादेशविरुद्ध टोलीले बनाएको अहिले सम्मकै उच्च स्कोर हो । जवाफमा ४०.४ ओभरमा सबै विकेट गुमाएको बंगलादेशले १ सय ६९ रन मात्र बनाउन सक्यो ।

रिटार्य हर्ट भएका कारण दक्षिण अफ्रिकी कप्तान फाफ डु प्लिसिसले शतक पुरा गर्न सकेनन् । उनले टोलीका उच्च ९१ रन बनाएका थिए । घरेलु टोलीका डाने पार्टेसनले ३ विकेट लिए । बंगलादेशका लागि सकिब अल हसनले मात्र अर्धशतब नाउन सके । उनले ६३ रन जोडेका थिए ।
एक वर्ष यता दक्षिण अफ्रिकाको यो सबैभन्दा फराकिलो जित हो । यसअघि सन् २०१६ मा दक्षिण अफ्रिकाले आयरल्यान्डलाई २ सय ६ रनले हराएको थियो । बंगलादेश दक्षिण अफ्रिकाको भ्रमणमा अझै जितको खोजीमा रहेको छ । टोलीले श्रृखंलाका मात्र होइन त्यसअघि अभ्यासमा पनि कुनै खेल जित्न सकेन । अब यी दुई टोलीबीच दुईवटा टि ट्वान्टी खेल हुनेछन् ।

दक्षिण अफ्रिकाले हासिम अमला र जेपी डुमिनीलाई आराम दिएको थियो । अमलाको ठाँउ लिएका टेम्बा बाभुवमाले ४८ रन जोडे । क्विन्टन डी ककले ७३, तथा डुमिनीको ठाँउ लिएर एक दिवसिय क्रिकेटमा डेब्यू गरेका एडिन मारक्रमले ६६ रन बनाए ।

मारक्रमले ३ ओभरमा बंगलादेशको २ विकेट पनि लिएका थिए । डु प्लिसिस खेलको म्यान अफ दी म्याच चुनिए भने डी कक म्यान अफ दी सिरिज घोषित भए । दक्षिण अफ्रिका र बंगलादेशबीचको पहिलो टि ट्वान्टी बिहीबार हुनेछ ।