काठमाडौं (हाम्रो खेलकुद) – नेपाली क्रिकेट टोली हङकङबाट आज स्वदेश फर्कदैछ । नेपाली क्रिकेट टोलीका व्यवस्थापक समेत रहेको टेक्निकल एनालिस्ट रमन शिवाकोटीका अनुसार टोली ड्रयागन एयरबाट राती १० बजे त्रिभुवन विमानस्थल ओर्लनेछ ।

हङकङसँग विश्व क्रिकेट लिग च्याम्पियनसिपका दुई खेलपछि नेपाल स्वदेश फर्कन लागेको हो । नेपाली टोली शुक्रबारको पहिलो खेलमा ८३ रनले पराजित भएको थियो । दोस्रो खेल सोमबार रद्द भएपछि दुवै टोली समान १ अंक पाएका थिए ।

त्यो खेल रद्द भएसँगै नेपाली टोली डिभिजन २ मा घटुवा भएको थियो । जसले विश्व कप छनोट खेल्ने नेपालको योजना असफल भएको थियो । अब फेरि नामिबियामा नेपालले डिभिजन २ मा प्रतिस्पर्धा गर्नेछ । त्यो प्रतियोगिताको शीर्ष २ मा पुग्ने टोलीले विश्व कप छनोट खेल्न पाउनेछ ।

विश्व क्रिकेट लिग च्याम्पियनसिपमा दुई खेल बाँकी रहँदै नेपाल घटुवामा परेको हो । नेपालले अहिले सम्म खेलका १२ मध्ये ४ खेलमा मात्र जित हासिल गरेको थियो भने १ एउटा रद्द र बाँकी ७ खेल गुमाएको थियो । टोलीको खातामा ९ अंक छ ।

सन् २०१५ जुलाईबाट सुरु भएको नेपालको विश्व क्रिकेट लिग च्याम्पियनसिपको यात्राका सुरुआती चार खेल सम्म नेपालले एउटा खेल जित्न सकेको थिएन । कीर्तिपुरमा सन् २०१६ को अप्रिलमा नामिबियालाई दुवै खेलमा हराएपछि नेपालको अघि बढ्ने सम्भावना देखिएको थियो ।

तर, हङकङसँगको पछिल्लो खेलको नतिजासँगै शीर्ष ४ मा पर्ने सम्भावना टुंगिएको छ । कप्तान पारस खड्काले च्याम्पियनसिपको शीर्ष चारमा पर्न नसक्नुमा आफुसहित खेलाडीहरु दोषी रहेको उल्लेख गर्दै  समर्थकसँग माफी पनि मागेका छन् । उनले डिभिजन २ बाट नेपाललाई विश्व कप छनोटमा पुर्याउने सक्दो प्रयास गर्ने पनि बताएका छन् ।