काठमाडौं (हाम्रो खेलकुद) – एभरेष्ट प्रिमियर लिग –इपिएल) टि ट्वान्टी क्रिकेट प्रतियोगितामा सहभागी हुन १ सय ६० खेलाडीले नाम दर्ता गराएका छन् । झन्डै दुई महिनापछि राजधानीमा हुने प्रतियोगिताका लागि ‘ए’, ‘बी’ र ‘सी’ गरी तीन श्रेणीमा १ सय ६० खेलाडीले नाम दर्ता गराएको एपिएलले जनाएको छ ।

यसका लागि इपिएलले असोज ९ देखि २३ गते सम्म आवेदन खुला गरेको थियो । इपिएलले दर्ता गराएका खेलाडीमध्ये ७० जनालाई मात्र अक्सनमा समावेश गर्ने बताएको छ । अक्सन कात्तिक ६ गते हुनेछ । मार्की (चर्चित) सहित प्रत्येक टोलीमा १५ खेलाडी हुनेछन् ।

१० खेलाडी अक्सनबाट छनोट गरिनेछ भने तीन जना विदेशी खेलाडी रहनेछन् । इपिएलमा ६० खेलाडी अक्सनमार्फत छनोट हुनेछन् । १८ विदेशी खेलाडीलाई प्रतियोगिताका लागि नेपाल बोलाइनेछ । एक स्थानीय खेलाडी ट्यालेन्ट हन्टमार्फत छनोट गरिनेछ ।

इपिएलमा विभिन्न ६ सहरले सहभागिता जनाउदैछन् । इपिएल खेल्ने टोलीमा काठमाडौं किंग्स इलावेन, ललितपुर पाट्रिओट्स, विराटनगर वारियर्स, भैरहवा ग्लाडिएटर, पोखरा राइनोज र चितवन टाइगर्स छन् ।

काठमाडौंमा सोमपाल कामी, ललितपुरमा ज्ञानेन्द्र मल्ल, विराटनगरमा पारस खड्का, भैरहवामा शरद भेषावकर, पोखरामा शक्ति गौचन र चितवनमा दीपेन्द्रसिंह ऐरी ‘मार्की’ खेलाडीका रुपमा रहेका छन् । प्रतियोगिताको विजेता टोलीले उपाधिसहित २१ लाख रुपैयाँ प्राप्त गर्नेछ ।