कोलकोता (एजेन्सी)– भारत र अस्ट्रेलियाबीचको दोस्रो एक दिवसिय क्रिकेट खेल आज हुँदैछ । पाँच एक दिवसिय श्रृखंलामा भारतले १–० को अग्रता लिइसकेको छ । निरन्तरको हारलाई रोक्दै अस्ट्रेलियाले श्रृखंलामा बराबरी गर्ने प्रयास गर्नेछ ।

पहिलो खेलमा अस्ट्रेलिया डिएलको आधारमा २६ रनमा पराजित भएको थियो । वर्षाका कारण २१ ओभरमा १ सय ६४ को लक्ष्य पछ्याएको भ्रमणकारी टोलीले ९ विकेट गुमाउँदै १ सय ३७ रन समेटिएको थियो ।

पछिल्लो १० खेलमा अस्ट्रेलिया एउटा खेल मात्र जित्न सफल भएको छ । सन् २०१६ मा आयरल्यान्डसँग जितेयता अस्ट्रेलियाले कुनै एक दिवसीय खेल जितेको छैन । भारतविरुद्धको श्रृखंलामा पुनरागमन गर्न अस्ट्रेलियन ब्याट्सम्यानले उच्च प्रदर्शन गर्न जरुरी छ । आज कोलकातामा हुने खेल अस्ट्रेलियाका कप्तान स्टिभ स्मिथको एक सयौं खेल हो ।

अर्को तिर भारतले इडेन गार्डेनमा रोहित शर्माबाट राम्रो प्रदर्शनको अपेक्षा गर्नेछ । रोहितले यो मैदानमा पछिल्लो ९ खेलमा १ सय १३.४२ को औसतमा ७ सय ९४ रन बनाएका छन् । इडेन गार्डेनको घाँसे मैदानले सिमरलाई समर्थन गर्नेछ । अघिल्लो आइपिएल सिजनमा सिमरले यस मैदानमा १६.४ को औसतमा ६१ विकेट लिएका थिए । जहाँ स्पिनरले २३ को औसतमा २४ विकेट मात्र लिन सकेका थिए ।