पोखरा (हाम्रो खेलकुद) – डाउन टाउन पोखरा लायन्सले माछापुच्छ्रे क्रिकेट लिग (एमसीएल) टि ट्वान्टी क्रिकेट प्रतियोगिताको उपाधि जितेको छ । एमसीसी क्रिकेट मैदान नदीपुरमा आज भएको फाइनलमा पर्वत टाइटन्सलाई ८ विकेटले हराउँदै डाउन टाउनले उपाधि जितेको हो ।

पर्वतले दिएको १ सय रनको लक्ष्य डाउन टाउनले १७.५ ओभरमा ३ विकेट गुमाएर पूरा ग¥यो । टोलीको जितमा सुदीप पौडेल अर्धशतक पुरा गरे । सुदीपले ५६ र अरुण अधिकारीले अविजित २७ रन जोडे । पर्वतका पारस लामिछाने र एगेन्द्र छन्त्यालले १–१ विकेट लिए ।

पहिले ब्याटिङ गरेको पर्वतले २० ओभरमा ९ विकेट गुमाएर ९९ रन बनाएको थियो । पर्वतका लागि पारस लामिछानेले १८, दिपेन राइमाझीले १६ तथा अविशेक थापाले अविजित १५ रन जोडे । पोखराका बिरु गुरुङ र हिमाल घलेले २–२ विकेट लिए ।

उपाधिसँगै पोखराले ३ लाख र पर्वतले २ लाख रुपैयाँ प्राप्त गर्यो । प्रतियोगितामा उत्कृष्ट खेलाडी बन्दै माछापुच्छ्रेका दिपेश खत्रीले २० हजार प्राप्त गरे । उत्कृष्ट ब्याट्सम्यान पनि दिपेश नै बने । यस्तै उत्कृष्ट बलर पोखराका बिरु गुरुङ घोषित भए । उत्कृष्ट ब्याट्सम्यान र बलरले समान १० हजार रुपैयाँ प्राप्त गरे ।

माछापुच्छ्रे क्रिकेट क्लब र खुकुरी इन्टरटेनमेन्टको आयोजनामा भदौं २० गतेबाट शुरु भएको प्रतियोगितानमा गण्डकी अञ्चलका विभिन्न ६ क्लबको सहभागिता थियो ।