पोखरा (हाम्रो खेलकुद) – पर्वत टाइटन्स पोखरामा जारी माछापुच्छे्र क्रिकेट लिग (एमसिएल) टी ट्वान्टी प्रतियोगिताको फाइनलमा पुगेको छ । एमसीसी क्रिकेट मैदान नदीपुरमा बिहीबार भएको दोस्रो क्वालिफायर खेलमा माछापुच्छ्रे लायन्सलाई ५ विकेटले हराउँदै पर्वत उपाधि नजिक हो ।

अब पर्वतले उपाधिका लागि डाउन टाउन पोखरा लायन्ससँग शनिबार प्रतिस्पर्धा गर्नेछ । डाउन टाउनले यसअघि पर्वत टाइटन्सलाई नै पराजित गर्दै फाइनल पुगिसकेको छ । माछापुच्छ्रेले दिएको १ सय १९ रनको लक्ष्य पर्वतले १८ ओभरमा ५ विकेट गुमाएर पुरा गरेको थियो ।

पर्वतका शाहिल कार्कीले सर्वाधिक ३१, पारस लामिछानेले २७ रन बनाए भने अनिष जिसी १७ रनमा अविजित रहे । एगेन्द्र छन्तयाल र दीपक रायमाझीले समान १० रन बनाए । माछापुच्छ्रेका अभिषेक सिंह ठकुरी र निर्मल क्षेत्रीले समान २ विकेट लिए ।

यसअघि पहिले ब्याटिङ गरेको माछापुच्छ्रेले निर्धारित २० ओभरमा ४ विकेट गुमाएर १ सय १८ रन बनाएको थियो । माछापुच्छ्रेका दिपेश खत्री ४० रनमा अविजित रहे । महेश रेग्मी ३८ र राजु खनाल १० रनमा आउट भए । पर्वतका राजु तामाङ र सन्तवान पौडेलले १/१ विकेट लिए ।

माछापुच्छ्रे क्रिकेट क्लब र खुकुरी इन्टरटेनमेन्टको आयोजनामा भदौं २० गतेबाट शुरु भएको प्रतियोगितानमा गण्डकी अञ्चलका विभिन्न ६ क्लबले सहभागिता जनाएका थिए । प्रतियोगिताको विजेताले उपाधिसहित ३ लाख रुपैयाँ पाउनेछ । उप विजेताले २ लाख रुपैयाँ पाउनेछ । प्रतियोगिताको उत्कृष्ट खेलाडीले २० हजार, बेस्ट बलर र बेस्ट ब्याट्सम्यानले समान १० हजार प्राप्त गर्नेछन् ।