काठमाडौं (हाम्रो खेलकुद)– नेपालले मलेसियामा जारी एसिसी यू १९ पूर्वी क्षेत्र क्रिकेट प्रतियोगिता अन्तर्गत लगातार तेस्रो खेल जितेको छ । नेपाली युवा टोलीले आज समूह चरणको अन्तिम खेलमा सिंगापुरलाई ७ विकेटले हराएको छ । अन्तिम चारमा यसअघि नै पुगेको नेपाल यो जितपछि समूह विजेता बनेको छ । सिंगापुर पनि यसअघि नै अघिल्लो चरण पुगिसकेको छ ।

६८ रनको लक्ष्य पछ्याएको नेपालले १३.४ ओभरमा ३ विकेट गुमाएर जित हासिल गरेको थियो । नेपालका लागि ओपनर सन्दीप सुनारले २०, अनिलकुमार शाहले १८ रन जोडे । अर्का ओपनर आसिफ शेख ६ रनमा आउट भए । सुमित महर्जन १० र सन्दीप जोरा ७ रनमा अविजित रहँदा नेपालले जित हासिल गरेको थियो । आसिफ र अनिलको विकेट अभि दिक्षितले लिएका थिए ।

भुटान र थाइल्यान्डमाथि सानदार जित दर्ता गरेको नेपालले आज टस जितेर ब्याटिङ रोजेको सिंगापुरलाई सस्तैमा अलआउट गरेको थियो । पवन सर्राफले ८ ओभरमा ४ मेडनसहित १२ रन खर्चेर ६ विकेट लिएपछि सिंगापुर २८.३ ओभरमा ६७ रन जोड्दै अलआउट भएको थियो । नेपालका लागि किशोर महतोले २ तथा सन्दीप लामिछाने र कप्तान दीपेन्द्र सिंह ऐरीले समान १ विकेट लिएका थिए ।

सिंगापुरका लागि सिद्धान्त र कप्तान आर्यमान सुनिलले समान २० तथा ओपनर रोहन रंगराजनले ११ रन बनाए । अन्य कुनै पनि ब्याट्सम्यानले दोहोरो अंकमा रन बनाउन सकेनन् । ५ खेलाडीले रनको खाता समेत खोल्न सकेनन् । समूह चरणमा नेपालले भुटानलाई ९ विकेट र त्यसअघि थाइल्यान्डलाई २ सय ५५ रनले हराएको थियो । थाइल्यान्डलाई ९२ रनले हराएको सिंगापुरले त्यसअघि भुटानलाई ९ विकेटले नै पराजित गरेको थियो ।