पोखरा (हाम्रो खेलकुद) – डाउन टाउन पोखरा लायन्स पोखरामा जारी माछापुच्छ्रे क्रिकेट लिग (एमसीएल) टि ट्वान्टी क्रिकेट प्रतियोगिताको फाइनलमा पुगेको छ । एमसीसी क्रिकेट मैदान नदीपुरमा बुधबार भएको क्वालिफायरको पहिलो खेलमा पर्वत टाइटन्सलाई २ विकेटले पराजित गर्दै डाउन टाउन एमसिएल क्रिकेटको फाइनल पुगेको हो ।

वर्षा कारण मैदान बिग्रिएपछि १६ ओभरमा घटाइएको खेलमा पर्वतले १६ ओभरमा सबै विकेट गुमाएर ७३ रन बनाएको थियो । पर्वतका अभिषेक थापाले २३, दिपेन रायमाझीले १८ रन बनाउनु बाहेक अन्य ब्याट्सम्यानले राम्रो प्रदर्शन गर्न सकेनन् । डाउन टाउनका बिरु गुरुङ, लाल बहादुर गुरुङ, प्रविन पाण्डे र हिमाल गाहाले समान २ विकेट लिए ।

७४ रनको लक्ष्य डाउन टाउनले १६ ओभरमै ८ विकेट गुमाएर पुरा गर्यो । डाउन टाउनका प्रविन पाण्डेले २७ तथा सुदिप पौडेलले १० रन बनाए । राजु तामाङ, राजु थापाले समान २ विकेट लिए । डाउन टाउनसँग पराजित भएको पर्वत टाइटन्सले छनोटको दोस्रो खेलमा माछापुच्छ्रे लायन्ससँग बिहिबार खेल्नेछ ।

माछापुच्छ्रे लायन्सले इलिमेटरको खेलमा भिएम वारियर्सलाई ८ विकेटले पराजित गर्दै अर्को चरणको लागि योग्य भएको हो । माछापुच्छ्रे क्रिकेट क्लब र खुकुरी इन्टरटेनमेन्टको आयोजनामा जारी लिगमा ६ टोलिको सहभागिता रहेको छ । विजेताले उपाधिसहित ३ लाख रुपैयाँ पाउनेछ । उप विजेताले २ लाख रुपैयाँ पाउनेछ । प्रतियोगिताको उत्कृष्ट खेलाडीले २० हजार, बेस्ट बलर र बेस्ट ब्याट्सम्यानले समान १० हजार प्राप्त गर्नेछन् ।