पोखरा (हाम्रो खेलकुद) – माछापुच्छ्रे लायन्स पोखरामा जारी माछापुच्छ्रे क्रिकेट लिग (एमसीएल) टि–२० क्रिकेट प्रतियोगिताको शीर्ष स्थानमा उक्लिएको छ । एमसीसी क्रिकेट मैदान नदीपुरमा शनिबार भएको समूह चरणको तेस्रो खेलमा माछापुच्छ्रे लायन्सले पर्वत टाइटन्सलाई ४४ रनले पराजित गर्दै आफ्नो शीर्षस्थानमा उक्लन सफल भएको हो ।

जितसँगै माछापुच्छ्रे ६ अंकसहित लिगको शीर्ष स्थानमा उक्लिएको छ तीन खेलमा दुईमा जित हात पारेको माछापुच्छ्रे एक खेलमा पराजित भएको थियो । ८५ रनको लक्ष्य पछ्याएको पर्वत टाइटन्स १५.३ ओभरमा अलआउट हुदै ४० रनमात्र बनाउन सक्यो । पर्वत टाइटन्सका सुरज श्रेष्ठले १० रन बनाउनुबाहेक अन्य ब्याट्सम्यानले दोहोरो अंक जोड्न सकेन । पर्वत टाइटन्सलाई सस्तैमा समेट्न माछापुच्छ्रेका शबी दुवेले ४ विकेट लिए । दिपेश खत्री र अभिषेक सिंह ठकुरीले समान २–२ विकेट लिए । यसअघि टस जितेर पहिले ब्याटिङ गरेको माछापुच्छ्रेले पुरै २० ओभरमा ७ विकेट गुमाएर ८४ रन बनाएको थियो ।

माछापुच्छ्रेका दिपेश खत्रीले २५ तथा २३ रनको योगदान दिए । अन्य ब्याट्सम्यानले दोहोरो अंक छुन सकेन । पर्वत टाइटन्सका एगेन्द्र छन्त्यालले २ विकेट लिए । यस्तै भिएम वारियर्स बाग्लुङले माछापुच्छ्रे क्रिकेट लिग (एमसीएल) टि–२० क्रिकेट प्रतियोगितामा पहिलो जित दर्ता गरेको छ ।

एमसीसी क्रिकेट मैदान नदीपुरमा शनिबार भएको समूह चरणको दोस्रो खेलमा भिएम वारियर्सले डाउन टाउन लायन्स क्लबलाई ५ विकेटले पराजित गर्दै प्रतियोगितामा पहिलो जित दर्ता गरेको हो । डाउन टाउनले दिएको ८३ रनको लक्ष्य भिएम वारियर्सले १८.३ ओभरमा ५ विकेट गुमाएर पूरा गर्यो । भिएम वारियर्सको जितमा म्यान दि म्याच बनेको विजय बिकेले नटआउट ३४ रनको योगदान दिए । अनुप श्रेष्ठ १३ रनमा अविजित तथा किसन खड्का १४ रनमा आउट भए । डाउनटाउनका बिरु गुरुङले ४ विकेट लिएपनि टिमलाई जिताउन सकेन ।

यसअघि टस जितेर पहिले ब्याटिङ गरेको डाउन टाउन १८.१ ओभरमा सबै विकेट गुमाएर ८२ रन बनाउन सक्यो । खराव शुरुवात गरेको डाउन टाउनको इनिङ्स मध्यक्रमका कृष्ण सेन र लाल बहादुर गुरुङले सम्हाल्ने प्रयास गरे । सेनले ३३ रन बनाए भने लाल बहादुर १६ रनमा आउट भए । डाउन टाउनलाई सस्तैमा समेट्न भिएम वारियर्सका सन्देश छन्त्याल, विजय बिके र तेजेन्द्र घर्तीमगरले समान २–२ विकेट लिए । माछापुच्छ्रे क्रिकेट क्लब र खुकुरी इन्टरटेनमेन्टको आयोजनामा जारी लिगमा ६ टोलिको सहभागिता रहेको छ । विजेताले ३ लाख पुरस्कार पाउने छन् । उपविजेताले २ लाख प्राप्त गर्नेछन् । प्रतियोगिताको उत्कृष्ट खेलाडीले २० हजार, बेस्ट बलर र बेस्ट ब्याट्सम्यानले समान १०–१० हजार प्राप्त गर्नेछन् ।