कोलोम्बो (एजेन्सी) – भारतसँग टेस्ट र एक दिवसीय क्रिकेट श्रृखंलामा ‘ह्वाइटवास’ भएको श्रीलंका एक मात्र टि ट्वान्टी क्रिकेटमा पनि ७ विकेटले पराजित भएको छ । भारतको जितमा कप्तान विराट कोहली फेरी एक पटक नायक बनेका छन् ।

गए राती १ सय ७१ रनको लक्ष्य पछ्याएको भारतले ओपनरद्वय रोहित शर्मा र केएल राहुललाई ४२ रनमा गुमाएको थियो । त्यसपछि कोहली र मनिष पाण्डेलाई जिततर्फ लम्बाए । कोहली ८२ रन बनाउदै पवेलियन फर्किए भने पाण्डेले अविजित ५१ रन जोडे । उनीहरुबीच १ सय १९ रनको साझेदारी भएको थियो ।

त्यसअघि कोलोम्बोको प्रेमदासा मैदानमा भारतले टस जितेर फिल्डिङ रोजेको थियो । श्रीलंकाले निर्धारित २० ओभरमा १ सय ७० रन बनाएको थियो । घरेलु टोलीका लागि दिलसान मुनाविराले ५३ रन बनाए । असन प्रियन्जनले अविजित ४० रन जाडे । भारतका युज्भेन्द्र चाहालले ३, कुलदिप यादवले २ तथा भुवनेश्वर कुमार र जस्प्रित बुम्राहले समान १ विकेट लिए ।

कोहलीको अर्को कीर्तिमान

भारतको जितमा नायक बनेका कप्तान कोहलीले टि ट्वान्टी क्रिकेटमा लक्ष्य पछ्याउँदा सबै भन्दा धेरै रन बनाउने ब्याट्सम्यान बनेका छन् । श्रीलंकाविरुद्ध ८२ रन बनाएपछि लक्ष्य पछ्याउने क्रममा उनको अहिले सम्मको १ हजार १६ रन पुरा भएको छ । न्युजिल्यान्डका ब्रेण्डन म्याकलमले १ हजार ६ रन बनाएका थिए ।
त्यस्तै कोहलीले सबै टि ट्वान्टीमा धेरै रन बनाउने भारतीय ब्याट्सम्यान पनि बनेका छन् । यसघि सुरेश रैनाको ६ हजर ८ सय ७२ रनलाई उछिन्दै कोहलीले ६ हजार ९ सय ७ रन बनाएका छन् ।