कोलम्बो (एजेन्सी) – भारतले श्रीलंकाविरुद्धको पाँच एक दिवसिय अन्तर्राष्ट्रिय क्रिकेटमा ‘ह्वाइटवास’ गरेको छ । श्रृखंलाको पाँचौं तथा अन्तिम खेलमा गए राती खेल जीवनमा पहिलो पटक भुवनेश्वर कुमारले ५ विकेट र कप्तान विराट कोहलीले अविजित शतक बनाएपछि भारतले श्रीलंकालाई ६ विकेटले हरायो । घरेलु मैदानमा श्रीलंका एक दिवसिय क्रिकेट श्रृखंलाको इतिहासमा पहिलो पटक ह्वाइवास भएको छ ।

२ सय ३९ रनको लक्ष्य पछ्याएको भारतले ४३.३ ओभरमा नै ४ विकेटको क्षेतिमा आवश्यक रन जोडेको यिथो । २७ रनमा दुवै ओपनर गुमाएपछि कप्तान कोहलीले भारतीय इनिङ्स सम्हालेका थिए । ओपनर रोहित शर्मा १६ रन र अजिंक्या रहाने ५ रनमा आउट भएपनि कोहलीले अविजित १ सय १० रनमा बनाउँदै टोलीलाई सहज जित दिलाएका थिए ।

कोहलीलाई केदार जादवले राम्रो साथ दिएका थिए । ६३ रन बनाएका जादवले चौथो विकेटका लागि कोहलीसँग १ सय ९ रनको साझेदारी गरेका थिए । जादवले ७३ बलमा ७ चौका प्रहार गरे । १ सय १६ बल खेल्दै कोहलीले ९ चौका प्रहार गरेका थिए । कोहलीको एक दिवसिय क्रिकेटमा त्यो ३० औं शतक हो ।

त्यसअघि टस जितेर ब्याटिङ गरेको श्रीलंकाले ४९.४ ओभरमा सबै विकेट गुमाएर २ सय ३७ रन जोडेको थियो । कप्तान उपुल थरंगाले ४८ , लहिरु थिरीमानेले ६७ र एञ्जेलो म्याथीयुसले ५५ बाहेक श्रीलंकाका अन्य ब्याट्सम्यानले राम्रो प्रदर्शन गर्न सकेनन् । श्रीलंकालाई सस्तोमा समेट्न भुवनेश्वर कुमारले ५ विकेट लिए । त्यस्तै जस्प्रित बुम्राहले २ विकेट हात पारे ।