कोलम्बो (एजेन्सी) –पाँच एक दिवसिय क्रिकेट श्रृखंलामा ४-० को अग्रता लिइसकेको भारतले आज कोलम्बोको प्रेमदसा रङ्गशालामा श्रीलंकासँग अन्तिम खेल खेल्दै छ । आफनै घरेलु मैदानमा लगातार चार खेल हारिसकेको श्रीलंका सान्तवना जितको खोजीमा हुनेछ भने भारत पाँचै खेल जित्दै श्रृखंला क्लिन-स्विप पार्ने लक्ष्यका साथ मैदानमा उत्रनेछ ।

यस खेलमा भारतले राम्रो लयमा रहेका आफ्ना ओपनर शिखर धवनलाई गुमाउने छ । आफ्नी आमाको स्वास्थ बिग्रेका कारण उनी भारत प्रस्थान गरेका हुन् । उनको स्थानमा अजिन्क्या राहाने टोलीमा सम्मिलित हुने सम्भावना रहेको छ ।

त्यस्तै चौथो खेलमा भारतका लागि मौका पाएका शर्दुल ठाकुर, मनिश पाण्डे र कुल्दिप यादवले फेरी पनि टोलीमा स्थान पाउने सम्भावना छ ।यसैगरी श्रीलंकाका लागि उपुल थरङ्गा टोलीमा फर्किने छन् । स्लो ओभर रेटका कारण तेस्रो र चौथो खेलमा उनी निलम्बनमा परेका थिए । त्यस्तै श्रीलंकाका दनुश्का गुनतिलकले फिट नरहेका कारण खेल गुमाउने छन् ।

भारतले पछिल्लो खेल १७१ रनको अन्तरले जितेको थियो । त्यस खेलमा विराट कोहली र रोहित शर्मा दुवैले भारतका लागि शतक बनाएका थिए । विश्वकपमा स्वत: छनोट हुन श्रीलंकालाई कम्तिमा दुई जित चाहिएको थियो ।

तर यो खेल श्रीलंकाले जितेमा वेष्ट इन्डिजले उसलाई विश्वकपमा स्थानका लागि उछिन्न इङल्यान्डसँगको पाँचै खेल तथा आयरल्यान्डसँगको एउटा खेल पनि जित्नु पर्ने हुन्छ । आजको खेल नेपाली समयानुसार दिउसोको २.४५ बजे सुरु हुने छ ।