कोलम्बो (एजेन्सी)– भारतीय क्रिकेट टोलीको जितको श्रृंखलालाई श्रीलंकाले चौथो खेलमा पनि रोक्न सकेन । पाँच दिवसिय अन्तर्राष्ट्रिय क्रिकेटको चौथा खेलमा आज भारतले घरले टोली श्रीलंकालाई १ सय ६८ रनको भारी अन्तरले हराएको छ । यसअघि नै श्रृखंला जितिसकेको भारतले चौथो खेलमा झन शानदार प्रदर्शन गरेको थियो । 

३ सय ७६ रनको विशाल लक्ष्य पछ्याएको श्रीलंका ४२.४ ओभरमा सबै विकेट गुमाएर २ सय ७ रनमा समेटिएको थियो । घरेलु टोलीका एन्जेलो म्याथ्युजले ७० रन प्रहार गरेपनि उनलाई कसैले राम्रो साथ दिएनन् । मिलिन्डा श्रीवर्दनाले ३९ र वानिन्दु हसरगां २२ रनमा पेविलियन फर्किए ।भारतका लागि जस्प्रित बुम्राह , हार्दिक पाण्डेया र कुलदिप यादवले समान २ तथा सार्दुल ठाकुर र अक्षर पटेलले समान १ विकेट लिए ।

त्यसअघि टस जितेर पहिले ब्याटिङ रोजेको भारतले निर्धारित ५० ओभरमा ५ विकेट गुमाउँदै ३ सय ७५ रनको विशाल योगफल तयार पारेको थियो । पहिले ब्याटिङ गर्ने क्रममा भारतले ६ रनमा ओपनर शिखर धवनलाई गुमाएपनि कप्तान विराट कोलही र रोहित शर्माले उत्कृष्ट साझेदारी गरेपछि भारत बलियो अवस्थामा पुगेको थियो ।

शतक बनाएका कोहली र रोहितले दोस्रो विकेटका लागि २ सय १९ रनको साझेदारी गरेका थिए । ७६ बलमा शतक पुरा गरेका कोहलीले ९६ बलमा १७ चौका र २ छक्का प्रहार गर्दै १ सय ३१ रन बनाएका थिए । त्यस्तै रोहितले ८८ बलको सामाना गर्दै १ सय ४ रन बनाए । त्यस्तै मनीष पाण्डेया ५० र महेन्द्र सिंह धोनी ४९ रनमा अविजित रहे । त्यो धोनीको तीन सर्यौ एक दिवसिय खेल थियो ।