सुरज भण्डारी
डलास (टेक्सस)– नेपाली राइनोज क्रिकेट क्लबले टेक्ससको प्रतिष्ठित व्यवसायिक क्रिकेट लिग डलास प्रिमियर (डिपिएलं लिग खेल्ने भएको छ । सन् २०१६ मा स्थापित क्लबले आउदो सेप्टेम्वर तेस्रो सातादेखि सुरु हुने डिपिएल खेल्न लागेको हो ।

नर्थ टेक्सस क्रिकेट एशोसिएशन अन्तर्गतको यस व्यवसायिक स्वरुपको यो लिगमा विश्वका विभिन्न देशमा प्रतिनिधित्व गरिसकेका र गरिरहेका प्रतिष्ठित खेलाडीहरुले विभिन्न क्लबवाट सहभागिता जनाउने गर्दछन् । नेपालको राष्ट्रिय टोली तथा युवा टोलीबाट प्रतिनिधित्व गरिसकेका खेलाडीहरुको पहलमा स्थापित नेपलिज राइनोजले यहाको विभिन्न प्रतियोगितामा भाग लिदै आएका छन् । त्यसमध्ये केही प्रतियोगिताको उपाधि समेत जितेका छन् ।

नेपलिज राइनोज क्लबवाट यहा रहेका तथा नेपालका समेत राष्ट्रिय टोलीका खेलाडी समेत समावेश गरिने क्लबका नियमित सदस्य सागर पन्तले बताए । विगतमा यस प्रिमियर लिगमा सहभागि भएका अन्य क्लबवाट आफुहरुले प्रतिनिधित्व गरेपनि अहिले भने आफुहरुकै क्लब सहभागि गराउन सकिएकोमा खुशी व्यक्त गर्दै उनले शशक्त टोलीको रुपमा क्लबलाई उभ्याउने योजना रहेको सुनाए ।

२० हजार डलर राशीको लिग प्रतियोगितामा सहभागिताका लागि खर्च समेत अत्यधिक हुने भएपनि नेपलिज क्रिकेट क्लबलाई माया गर्ने सबैको साथ र सहयोगले संभव भएको क्लबका अध्यक्ष थलराज पन्तले बताए । पछिल्लो पटक क्लबले नेपाली राष्ट्रिय टोलीका कप्तान पारस खड्का सहितका खेलाडीहरुलाई सहभागी गराउदैं व्यवसायिक क्लबहरु सहभागि रहने ह्युष्टनमा भएको ६० हजार राशीको टु एक्स युएएस कप जितिसकेको छ । राइनोजले गतबर्ष पुष महिनामा सम्पन्न रुस्लान कप प्रतियोगितामा टिम सहभागी गराएको थियो । शरद भेषावकर, सुशील कंडेल, पवन शर्राफ, सोनु तामांग, रुपेश श्रीवास्तब, प्रकाश बिस्ट लगायत क्रिकेटरहरु क्लबवाट खेलेका थिए ।

क्लबले विभिन्न प्रतियोगिता खेल्नुका साथैं हिमालय क्रिकेट एकेडेमीमा २ जना क्रिकेटरहरुलाई १ बर्षे क्रिकेट छात्रवृत्ति, नेपालमा महिला क्रिकेट विकासमा काम गरिरहेको राइजिंग क्रिकेट वुमेन्स क्लबलाई पनि ५० हजार आर्थिक सहयोग तथा यस्तै क्रिकेट फ्यानहरुको संस्था नेपाली क्रिकेट समर्थक समाजलाई पनि सहयोग गरेको बताउदैं क्लबका अर्का सदस्य आशिक लामाले नेपालमा समेत नेपाली क्रिकेटको विकासमा सकेको सहयोग गर्दै जाने जनाए ।

डिपिएलका लागि टोलीका नियमित सदस्य वरदान चालिसे, सागर पन्त, राकेश कर्ण, आशिक लामा, किरण श्रेष्ठका लगायतका साथैं नेपाली राष्ट्रिय टोलीका पूर्व खेलाडी कनिस्क चौगाईं सहित अन्य खेलाडीलाई खेलाउने तयारी क्लबले गरेको छ ।