बालागोल्ला (हाम्रो खेलकुद)– भारतले श्रीलंकालाई ३ विकेटले हराउँदै पाँच एक दिवसिय श्रृंखलामा २–० को अग्रता बनाएको छ । पहिलो खेलमा भारतले श्रीलंकामाथि ९ विकेटको जित दर्ता गरेको थियो ।

श्रीलंकाविरुद्धको दोस्रो एक दिवसिय क्रिकेटमा ब्याटिङ गर्दै महेन्द्रसिंह धोनी ।

बिहीबार राती सम्पन्न खेलमा टस हारेर पहिले ब्याटिङको निम्तो पाएको श्रीलंकाले ५० ओभरमा ८ विकेटको क्षतिमा २ सय ३६ रन बनाएको थियो । तर, वर्षा कारण केही समय खेल अवरुद्ध भएकाले भारतले डक वर्थ लुइस नियमका आधारमा ४७ ओभरमा २ सय ३१ रनको नयाँँ लक्ष्य पाएको थियो । सो लक्ष्य भारतले रोमाञ्चक तरिकाले ४४.२ ओभरमा पुरा गरेको थियो ।

भारतका ओपनरहरुले निकै राम्रो सुरुवात गर्दै पहिलो विकेटका लागि १ सय ९ रनको साझेदारी गरेका थिए । पहिलो खेलका ुम्यान अफ द म्याचु शिखर धवनले १ छक्का र ६ चौकाको मद्दतले ५० बलको सामना गर्दै ४९ रन बनाए ।

अर्का ओपनर रोहित शर्माले पनि आक्रामक पारी खेल्दै ४५ बलमा ५४ रन जोडे । धवनका रुपमा पहिलो विकेट गुमाएको भारतले त्यसपछिको १० रन जोड्दा अरु ५ विकेट गुमाएको थियो । अकिला दनन्जयले ६ विकेट लिँदै भारतको मध्यक्रमलाई धराशायी पारेका थिए ।

तर, भुवनेश्वर कुमार र महेन्द्र सिंह धोनीको आठौँ विकेटका लागि सय रनको साझेदारीले दनन्जयको प्रदर्शनलाई छायाँमा पारिदियो । धोनीले ६८ बल खेल्दै अविजित ४५ रन आफ्नो खातामा जोडे । भुवनेश्वर कुमारले आफ्नो अर्धशतकीय पारीमा ५३ रन बनाए ।

त्यसअघि कप्तान उपुल थरङ्गा (९) र एन्जेलो म्याथ्युज (२०) सस्तैमा आउट भएका थिए । छैटौं नम्बरमा ब्याटिङ गर्न आएका मिलिन्दा सिरिवदनाले चामरा कपुगेदेरासँग मिलेर छैटौं विकेटका लागि ९१ रनको साझेदारी गर्दै श्रीलंकाको ब्याटिङ पारी सम्हालेका थिए ।

कपुगेदेराले ६१ बल खेल्दै ४० र सिरिवदनाले श्रीलंकाका लागि सर्वाधिक ५८ रन जोड्न सफल भएका थिए । भारतका लागि तीब्र गतिका बलर जस्प्रित बुम्राहले सर्वाधिक ४ विकेट लिएका थिए । यसैगरी, युज्भेन्द्र चहलले २ तथा हार्दिक पाण्डेया र अक्षर पटेलले समान १ विकेट लिए ।

श्रृंखला बचाउनका लागि श्रीलंकाले आउने खेल जित्नै पर्ने हुन्छ । तेस्रो एक दिवसीय खेल आइतबार बालागोल्लास्थित पालेकेले अन्तर्राष्ट्रिय क्रिकेट मैदानमै खेलिने छ । विश्व कपमा स्वतः छनोट हुनका लागि श्रीलंकाले श्रृखंलामा कम्तीमा दुई खेल जित्नै पर्ने हुन्छ ।