काठमाडौँ (एजेन्सी) – नेपाली महिला क्रिकेटमा लामो समयदेखि सक्रिय रहेको राइजिङ क्रिकेट फर वुमन (आरसीडब्लु) टोली विशेष प्रशिक्षणका लागि भारत पुगेको छ। विश्वकप छनोटको तयारीलाई लक्षित गर्दै ८ सदस्यीय टोली १५ दिने कार्यक्रममा सहभागी हुन शुक्रबार दिल्ली पुगेको हो।

दिल्लीस्थित टि.एन. मेमोरियल एकेडेमीले नेपाली टोलीलाई प्रशिक्षणका लागि विशेष आमन्त्रण गरेपछि टोली त्यसतर्फ बुधबार प्रस्थान गरेको थियो। टोलीले श्रावण २८ गतेदेखि भाद्र ११ गतेसम्म त्यहाँ रहेर दैनिक प्रशिक्षण गर्ने कार्यक्रम रहेको छ। प्रशिक्षण र बसाईंको व्यवस्था एकेडेमीले गर्नेछ भने अन्य व्यवस्था टोली आफैंले लिने क्लब प्रतिनिधि आरती बिडारीले जानकारी दिईन। केहि खेलाडी व्यक्तिगत खर्चमा त्यहाँ पुगेका हुन् भने केहि खेलाडीको खर्च क्लब आफैंले व्येहोर्ने उनले बताइन।

केहि महिना अघि अत्तरिया कप महिला टि२० क्रिकेट प्रतियोगिताको विजयी टोलीबाट उत्कृष्ट रहेका केहि सदस्यसहित टोली इन्दिरापुरम पुगेको हो । टोलीमा राष्ट्रिय टोलीकी कप्तान रुबिना क्षेत्री सहित नेरी थापा मगर, अश्मिना कर्माचार्य, आरति बिडारी, गीता गोसाई, रोम थापा, सुमन खतिवडा रहेका छन्। टोलीले त्यहाँ रहेर प्रशिक्षणसँगै एकेडेमीकै अन्य टोलीसँग समन्वय गरेर केहि अभ्यास खेल पनि खेल्नेछन्। व्यवस्थापक मालिका शर्मा पनि टोलीसँगै भारत प्रस्थान गरेकी छिन्।

विश्वकप छनोटको लागि राष्ट्रिय खेलाडीहरुको तयारी र केहि नयाँ अनुहारलाई एक्सपोजर दिएर राष्ट्रिय टोलीमा पर्न सहयोग पुग्ने हेतुले यस कार्यक्रमको योजना गरेको प्रतिनिधि बिडारीले जानकारी दिईन। टोलीले एकेडेमीमा रहेर दैनिक २ पटक अभ्यास गर्नेछ। टोलीलाई भारत भ्रमणका लागि केशर कन्सल्टेन्सीले सहयोग गरेको छ।