पोखरा (हाम्रो खेलकुद) – साउनको अन्तिम साताबाट सुरु हुने माछापुच्छ्रे क्रिकेट लिगको अक्सन आइतबार हुने भएको छ । माछापुच्छ्रे क्रिकेट क्लब र खुकुरी इन्टरटेनमेन्टको आयोजनामा हुने टि२० लिग भदौ ६ गतेदेखि पोखरामा हुँदैछ।

१ सय ३५ खेलाडी सहभागी हुने अक्सनमा टोलीहरुले खेलाडीमाथि बोली लगाउनेछन्। गण्डकी र धौलागिरी अञ्चलका खेलाडीहरु मात्र सहभागी हुने यस प्रतियोगितामा ६ टोलीको सहभागिता रहेको छ। प्रतियोगिताको सम्पूर्ण खेल माछापुच्छ्रे क्रिकेट क्लबको मैदानमा हुनेछ ।

प्रतियोगितामा सहभागी हरेक टिमले लिग चरणमा एक–एक खेल खेल्नेछन् । शीर्ष चार टोली प्लेअफको लागि छानिने छन् । प्लेअफमा पहिलो हुने टिम फाइनल प्रवेश गर्नेछ । पराजित हुनेले फाइनल प्रवेशका लागि तेस्रो र चौथो टिमबीचको विजेतासँग एलिमिनेटर खेल खेल्नेछ।

लिगको विजेताले ३ लाख पुरस्कार पाउने छन् भने उपविजेताले २ लाख प्राप्त गर्नेछन् । प्रतियोगिताको उत्कृष्ट खेलाडीले २० हजार प्राप्त गर्दा बेस्ट बलर र बेस्ट ब्याट्सम्यानले १०–१० हजार पाउने छन् । यस्तै प्रत्येक खेलको म्यान अफ दि म्याचले २ हजार र फाइनलमा म्यान अफ दि म्याच हुनेले ५ हजार पुरस्कार प्राप्त गर्ने छन् ।

लिगमा आयोजक माछापुच्छ्रे लायन्स, भीएम वारिअर्स, डाउन टाउन लायन्स पोखरा, इन्फरम्याटिक्स कलेज चिता, पर्वत टाइटन्स र केकेएएफ स्याङ्गजा च्यालेन्जर्सको सहभागिता रहने छ। टोलीका कप्तानहरुको घोषणा यसअघी नै भइसकेको छ।

नेपालको लागि उमेर समूहका प्रतियोगिता खेलिसकेका दिपेश खत्रीले माछापुच्छ्रे लायन्सको कप्तानी सम्हालेका छन् भने विजय विकेले भीएम वारियर्सको नेतृत्व गर्नेछन्। यसैगरी डाउन टाउन लायन्स पोखराको कप्तानमा राजु गुरुङ र इन्फरम्याटिक्स कलेजको कप्तान प्रबिन ढकाल रहेका छन्। पर्वत टाइटन्सका लागि राजु थापा र केकेएएफ स्याङ्गजा च्यालेन्जर्सको कपतानमा दिवाकर थापाले कप्तानी गर्नेछन्।