काठमाडौँ (हाम्रो खेलकुद) – आइसीसी यू१९ विश्वकपको छनोट चरण (एसिया क्षेत्र) अन्तर्गत नेपालले चौथो खेलमा आयोजक सिंगापुरको सामना गर्दैछ। टस जितेर ब्याटिङ रोजेको नेपालले २५ ओभरको खेल सकिंदासम्म ४ विकेटको क्षतिमा ९६ रन जोड्न सफल भएको छ।

विगतको खेलको तुलनामा ब्याटिङ क्रम परिवर्तन गरेको नेपालका लागि सन्दिप सुनार र अनिल शाह पारीको सुरुवात गर्न आएका थिए। पारीको तेश्रो ओभरमै नयाँ ओपनर अनिल शाह ७ रन्को व्यक्तिगत स्कोर बनाउँदै आर्यमान सुनिलको बलमा फाइन लेगको दिशामा क्याच आउट भए। तेश्रो नम्बरमा ब्याटिङ गर्न आएका प्रनित थापा पनि ८ रन जोड्दै कट बिहाइन्ड भए।

पछिल्ला खेलमा ओपनरको भूमिका निर्वाह गरेका आसिफ शेख ३ रनमा बोल्ड भए। टोलीको योगफल ३९ रन छंदा उनि आहान गोपीनाथले फ्याँकेको १२औं ओभरमा बोल्ड भएका थिए। २०औं ओभरमा सन्दिप सुनार पनि आहानकै बलमा कट बिहाइन्ड भए। उनले ५५ बलको सामना गर्दै २ चौका र १ छक्काको मद्दतले २६ रन जोडेका थिए।

अहिले क्रिजमा दिपेन्द्र सिंह ऐरी र रोहित कुमार पौडेल ब्याटिङ गर्दै छन्। दिपेन्द्र सिंह ऐरी २५ रनमा अविजित छन् भने रोहित १२ रन बनाएर खेलिरहेका छन्। नेपालका लागि ब्याटिङ क्रममा यसपछि प्रकाश केसी र पवन शर्राफको नाम रहेको छ। त्यसपश्चात बलरहरु सन्दिप लामिछाने, ललित राजवंशी र किशोर महतो रहेका छन्।