काठमाडौँ (हाम्रो खेलकुद) – अफगानिस्तान विरुद्ध १ सय ९१ रन पछ्याएको नेपाली टोली ४९ रनमा अल आउट भएपछि सिंगापुरमा जारी आइसीसी यू१९ विश्वकप छनोट (एसिया क्षेत्र)मा नेपालको छनोट हुने सम्भावना अब न्यून भएको छ। खेलपश्चात पत्रकारको प्रश्नमा जवाफ दिंदै टोलीका प्रशिक्षक बिनोद दासले नेपालको खराब ब्याटिङ हारको मुख्य कारण भएको बताएका छन्।

उनले खेलाडीहरुले गरेको प्रदर्शनप्रति असन्तुष्टि व्यक्त गर्दै ब्याटिङमा सुधार गर्नु एकदम जरुरी रहेको बताए। ‘ जब १० ओभरमै टोलीका शीर्ष ६ ब्याट्सम्यान पेभेलियनमा हुन्छन् भने म त्यस्तो प्रदर्शनबारे केहि भन्न सक्दिन। उनीहरुले राम्रो बलिङ गरेका हुन् तर हामीले ब्याटिङ गर्न नसकेकोमा कुनै किसिमको बहाना पनि हामीले दिन सक्दैनौं। हाम्रो ब्याटिङप्रतिको दृष्टिकोण नै यसको मुख्य कारक हो।‘

उनले टोलीको ब्याटिङ एक्कासी खराब हुनुमा पिचको खराबी नरहेको पनि स्वीकारे। ‘हामीले सुरुवातमै आफ्ना शीर्ष क्रमका ब्याट्सम्यानलाई गुमाउनुमा पिचको केहि गल्ति छैन। हाम्रा ब्याट्सम्यानले खेलको अवस्था हेरेर ब्याटिङ गर्न सकिरहेका छैनन्। हाम्रो  ब्याट्सम्यानहरुले प्रतियोगिताको कुनै खेलमा पनि राम्रो प्रदर्शन गर्न सकेनन्।’ अफगानिस्तानविरुद्धको खेलमा नेपालका शीर्षक्रमका कुनै ब्याट्सम्यानले पनि दोहोरो अंकमा रन बनाउन सकेनन।

प्रशिक्षक दासले विश्वकपमा छनोट हुने सम्भावनालाई भने अन्त्यसम्म पनि प्रयास जारी राख्ने बताए। ‘हामीसँग अझै ३ खेल छन् र सबैमा उत्कृष्ट प्रदर्शन गर्ने हाम्रो लक्ष्य हुनेछ। हामीले यस प्रतियोगिताका लागि लामो समयदेखि निकै मेहेनत गर्दै आएका छौँ। हामीलाई अरुलाई भन्दा धेरै दुख लागेको छ तर हामी अझै सुधार गरेर मैदानमा उत्रनेछौँ। हामी बाँकी खेलमा राम्रो प्रदर्शन गरेर अन्तिमसम्म के हुन्छ हेर्नेछौँ।।’