काठमाडौं (हाम्रो खेलकुद) – अभ्यास खेल र विशेष प्रशिक्षणको लागि भारतको नोयडा पुगेको नेपाली राष्ट्रिय यु–१९ टोलीले पहिलो अभ्यास खेलमा जित हाँसिल गरेको छ । गौतम बुद्ध युनिभर्सिटी क्रिकेट मैदानमा मंगलबार भएको खेलमा नेपाली यु–१९ टोलीले फ्रेन्ड्स स्पोर्टस एकेडेमीलाई १ सय २१ रनको फराकिलो रन अन्तरले पराजित गरेको हो ।

नेपालले दिएको २ सय ५१ रनको लक्ष्य पछ्याएको फ्रेन्डस् स्पोर्टस्ले ३२ ओभरमा सबै विकेट गुमाएर १ सय २९ रनमात्र बनाउन सक्यो । फ्रेन्डस् स्पोर्टस् एकेडेमीका लागि मध्यक्रमका सोनु गुजारले ३६ रन बनाए । बबी यादव २४, सञ्जीव आधना र जितेन्द्र चौधरीले समान १८ रन बनाएर आउट भए ।

अरविन्द भाटी ९, आशिफ खान ७ र विकास सिंह ४ रनमा पभेलियन फर्किदा विपिन खारी र कांसिक भाटीले रनको खाता नै खोल्न सकेन । फ्रेन्डस् स्पोर्टस्लाई सस्तैमा समेट्न साहव आलम एक्लैले तीन विकेट लिए । यस्तै सन्दिप लामिछाने, रोहित पौडेलले समान २ विकेट लिदा किशोर महतो, रिजन ढकाल र ललित राजवंशीले समान १ विकेट लिए ।
त्यसअघि टस हारेर पहिले ब्याटिङको निम्तो पाएको नेपाली युवा टोलीले निर्धारित ४० ओभरमा ७ विकेट गुमाएर २ सय ५० रनको योगफल तयार पारेको थियो । नेपालका लागि प्रनित थापामगर र अनिल कुमार शाहले अर्धशतकीय इनिङ्स खेले । प्रनित ८० रन तथा अनिल ५० रन बनाएर आउट भए ।

एक समय ११ ओभरमा २७ रन बनाउदा तीन विकेट गुमाएको नेपालको इनिङ्स दिपेन्द्र सिंह ऐरी र प्रनित थापामगरले सम्हाले । दिपेन्द्रसिंह अर्धशतक बनाउनबाट ६ रनले चुके । रोहित पौडेलले २३ रनमा अविजित रहे । आदिल खान १३ र सन्दिप सुनार १० रन बनाए पभेलियन फर्कदा ओपनर आशिफ शेखले रनको खाता नै खोल्न सकेनन् । फ्रेन्डस् स्पोर्टस्का सोनु गुजारले एक विकेट लिए । अभ्यास र प्रशिक्षणको लागि नेपाली टोली दुईसाता अघि नोयडा पुगेको थियो ।