काठमाडौं (हाम्रो खेलकुद) – चितवन टाइगर्स र नेप्लो मार्ट राजधानीमा जारी एइसी इन्डोर क्रिकेट प्रतियोगिताको सेमिफाइनलमा प्रवेश गरेको छ।

कोटेश्वरस्थित अल्टिमेट इन्डार क्रिकेटको खेल मैदानमा बिहिबार भएको खेलमा चितवन टाइगर्सले ट्रिटन कलेजमाथि ४४ रनको जित निकाल्दै अन्तिम चारमा स्थान सुरक्षित गरेको हो । यस्तै नेप्लो मार्टले किरण वारियर्समाथि ३४ रनको जित निकाल्दै अन्तिम चारमा स्थान सुरक्षित गरेको हो । कोस्तुप कलेज र राइजिङ नेपालले पनि अन्तिम चारमा स्थान बनायो ।

१ सय ४५ रनको लक्ष्य पछ्याएको ट्रिटनले निर्धारित १८ ओभरमा ९८ रनमात्र बनाउन सक्यो । ट्रिटनका सोमेश यादवले २२ तथा अमित श्रेष्ठले २१ रन बनाए । चितवन टाइगर्सका आवाज घिमिरेले चार विकेट लिए । यसअघि पहिले ब्याटिङ गरेको चितवनले कृष्ण नेघीको ३७ तथा आवाज घिमिरेको ३१ रनको मद्दतमा १ सय ४४ रन बनाएको थियो ।

अर्काे क्वार्टफाइनलमा नेप्लोमार्टले दिएको १ सय ६६ रनको लक्ष्य पछ्याएको किरण वारियर्सले १ सय ३१ रनमात्र बनाउन सक्यो । उसका लागि सौरभ सुवेदी र किरण उप्रेतीले समान २८–२८ रन बनाएपनि टिमलाई जिताउन सकेन । नेप्लोमार्टका नवीन यादवले तीन विकेट लिए । यसअघि पहिले ब्याटिङ गरेको नेप्लोमार्टका लागि जीवन खानले २७ तथा नवीन यादवले २५ रन जोडेका थिए ।

अर्काे खेलमा कौस्तुप कलेजले योर्स टेक्नोलोजीमाथि १ सय ६४ रनको शानदार जित निकाल्यो । १ सय ५१ रनको लक्ष्य पछ्याएको योर्स टेक्नोलोजीले निर्धारित १८ ओभरमा थप १४ रन गुमाएको थियो । उसका लागि प्रकाश विष्टले १८ रन बनाएको थियो । कौस्तुपका दिपेन्द्र मैनालीले चार तथा रुपेश श्रीवास्तवले तीन विकेट लिए । यसअघि पहिले ब्याटिङ गरेको कौस्तुप कलेजले प्रकाश विष्टको ३६ तथा दिपेन्द्र मैनालीको ३१ रनको मद्दतमा १ सय ५० रन बनाएको थियो । अर्काे खेलमा राइजिङ नेपालले काठमाडौं स्टारमाथि ७४ रनको जित निकाल्यो । १ सय ७० रनको लक्ष्य पछ्याएको काठमाडौं स्टारले ९५ रनमात्र बनाउन सक्यो । सम्यम दवाडीले १६ रन जोड्दा राइजिङका प्रतिक कान्तले विकेट लिए । पहिले ब्याटिङ गरेको राइजिङले निर्धारित १८ ओभरमा सौरभ पेलाको ४५ तथा प्रनित गिरीको २७ रनको मद्दतमा १ सुय ६९ रन बनाएको थियो ।

सेमिफाइनल र फाइनलका खेलहरु शुक्रबार हुने आयोजकले जानकारी गराएको छ । सेमिफाइनलको पहिलो खेलमा नेप्लोमार्टले चितवन टाइगर्स तथा दोस्रो सेमिफाइनलमा कौस्तुप कलेजले राइजिङ नेपालको सामना गर्नेछ ।