सुबास हुमागाईं

काठमाडौँ – आज बाट किर्तिपुरस्थित त्रिभुवन अन्तर्राष्ट्रिय क्रिकेट मैदानमा सुरु हुने भनिएको एसियन क्लब प्रिमिएर लिग टि-२० (एपिएल टि-२०) तयारी पुरा नभएका कारण सुरु हुन सकेन। दिनको २ बजे खेल सुरु हुने र १ बजे उद्घाटन कार्यक्रम गरिने भनिएपनि खेल भने हुनसकेन।

सामान्यतया खेलको १ घण्टा अगाडीबाट खेलाडीहरु मैदानमा वार्म अप गरिरहेका हुन्थे तर टि.यू. मैदानमा भने आज १ बजे खेलाडीहरु अनुपस्थित थिए र व्यवस्थापन पक्ष मैदानलाई तयार गर्न व्यस्त थियो। उद्घाटनको लागि खेलमैदानको भित्रै उत्तरपट्टिको भागमा स्टेज तयार पारिएको थियो। दिनको २:३० बजे टोलीहरुको आगमनपछि ३ बजे उद्घाटन सत्र सुरु भयो। तर, उद्घाटन समारोहमा सबै टोलीका कप्तान हरु उपस्थित रहेका थिएनन्। कुनै टोलीका कप्तान त कुनैका मेन्टर उद्घाटनमा सामेल भए।

दुवै टोली उद्घाटन सकिएको केहि समयपछि मैदानमा उत्रियो। अम्पायरहरु पनि पिच तर्फ गए तर खेलमा टस हुन सकेन। धेरै समयको विश्रामपछि आयोजकले समय अभावको कारण देखाउँदै खेल स्थगित गरेको जानकारी दियो। नेपाल स्टर्म र दुबई वारियार्सबीच हुने भनिएको खेल अब अरु दिनको लागि सारिएको छ। प्रतियोगिताका अन्य खेल पुरानै तालिका अनुसार चल्ने आयोजक अध्यक्ष डान्डीवालले दिए।

नेपाल स्टर्म टोलीबाट नेपालका ५ खेलाडी खेल्ने भएका छन्। यद्दपी परेश लोहनीले भने आजको खेल चोटका कारण गुमाउने भएका थिए। भुपेन्द्र थापा, सिद्धान्त राज शाही, अमर सिंह राउटेला र राजबिर सिंहले नेपालको प्रतिनिधित्व गर्दैछन्।