एजेन्सी – घरेलु टोली इङल्याण्डलाई ८ विकेटले पराजित गर्दै पाकिस्तान आइसीसी च्याम्पियन्स ट्रफीकको फाइनलमा पुगेको छ।

पाकिस्तानी बलरहरुले उत्कृष्ट प्रदर्शन गरेपछि पहिलो ब्याटिङको निम्तो पाएको इङल्याण्ड सामान्य योगफलमै सिमित भएको थियो। ४९.५ ओभरमा सबै विकेट गुमाएको घरेलु टोलीले २ सय ११ रन जोडेको थियो। ओपनर जोनी बेयरस्टोले ४३ रन जोडे भने जो रुटले सर्वाधिक ४६ रन बनाए। कप्तान ओइन मोर्गनले ३३ रनको योगदान दिंदा बेन स्टोक्सले बिना कुनै बाउण्ड्री ३४ रन जोडे। तल्लो क्रमका ब्याट्सम्यानहरु सस्तैमा आउट हुँदा इङल्याण्डले सोचेजस्तो अन्त्य गर्न सकेन।

पाकिस्तानका लागि म्यान अफ द म्याच घोषित हसन अलिले १० ओभरमा ३५ रनमात्र खर्चेर ३ विकेट लिएका थिए। जुनेद खान र रुमान रइसले २/२ विकेट लिंदा शादाव खानको नाममा १ विकेट रह्यो।

जवाफी ब्याटिङमा उत्रिएको पाकिस्तानले २ सय १२ रनको लक्ष्य ३७.१ ओभरमै पुरा गर्यो। ओपनरद्वय अजहर अली र फखार जमानले १ सय १८ रनको साझेदारी गर्दै उत्कृष्ट सुरुवात दिलाएका थिए। फखारले ५७ रन जोडे भने अजहरले ७६ रनको पारी खेले। पाकिस्तानका लागि बाबर आजम ३८ र मोहम्मद हफिज ३१ रनमा अविजित रहे।

फाइनलमा पाकिस्तानको भेट भारत र बंगलादेशको खेलको विजेतासँग हुनेछ।