काठमाडौं (हाम्रो खेलकुद)– अर्को साताबाट राजधानीमा सुरु हुने भनिएको एसियन प्रिमियर लिग (एपिएल) क्रिकेट च्याम्पियनसिप आयोजनाका विषयलाई लिएर क्रिकेट प्लेयर एसोसिएसन अफ नेपाल (सिप्यान) ले गभ्भिर प्रश्न उठाएको छ । विदेशी व्यवस्थापन कम्पनीले आयोजना नेपालमा ठूलो प्रतियोगिता आयोजना हुनु सुखद हुँदा हुँदै त्यसले कुनै प्रक्रिया पुरा नगरेको सिप्यानले विज्ञप्तीमार्फत उजागर गरेको छ ।

नेपाली राष्ट्रिय क्रिकेट टोलीका कप्तान समेत रहेका सिप्यानका महासचिव पारस खड्काले सोमबार विज्ञप्ती जारी गर्दै भनेका छन्,‘एपिएलमा कुनै पनि नेपाली खेलाडी र अफिसियलको सहभागिता छैन । अन्तर्राष्ट्रिय क्रिकेट परिषद् (आइसिसी) र एसियन क्रिकेट काउन्सिल (एसिसी) बाट पनि च्याम्पियनसिपका लागि स्वीकृति लिइएको छैन । त्यसका साथै क्रिकेट खेल विना कुनै अवरोध सञ्चालन गर्न विश्वका कुनै पनि व्यवसायिक लिगले आइसिसीको भ्रष्टाचार विरोधी कानुनको पालना गरेको हुनुपर्दछ । ’

सिप्यानले एपिएल आयोजनाले आइसिसी यू १९ विश्व छनोटका लागि नेपाली टोलीको तयारीमा समेत असर परेको उल्लेख गरेको छ । विज्ञप्तीमा भनिएको छ ‘हाम्रो यू १९ टोलीको बन्द प्रशिक्षण सुरु भएको छ । तर एपिएल आयोजनाले यू १९ को तयारीका लागि १५ दिन मैदान उपलब्ध हुने छैन । छनोट नेपालका लागि महत्त्वपूर्ण प्रतियोगिता हो ।’

राष्ट्रिय खेलकुद परिषद् (राखेप) ले एपिएल आयोजनाका लागि स्वीकृति दिएपनि त्यसले न त स्थानिय खेलाडी वा समग्रमा नेपाली क्रिकेट विकासका लागि कुनै फाइदा नपुग्ने सिप्यानले ठहर गरेको छ । हाल अमेरिका भ्रमणमा रहेका सिप्यानका महासचिव पारसले जारी गरेको विज्ञप्तीमार्फत आयोजकको अपारदर्शीतालाई प्रश्न गरिएको छ । उनले अगाडि भनेका छन्,‘आयोजक, सहभागी टोलीका मालिक र अन्य आर्थिक पाटोका बारेमा पनि कुनै जानकारी छैन । नेपाली क्रिकेटका स्थानिय सरोकारवालाहरुसँग सबै विषय पारदर्शी हुनुपर्दछ ।’