एजेन्सी – शकिब अल हसन र महमुदुल्लाहले पाँचौ विकेटका लागि २ सय २४ रनको साझेदारी गरेपछि बंगलादेशले न्युजिल्यान्डलाइ ५ विकेटले पराजित गर्दै च्याम्पियन्स ट्रफी को दोश्रो चरणमा पुग्ने सम्भावनालाई बलियो बनाएको छ।

२ सय ६६ रनको लक्ष्य लिएर मैदानमा उत्रिएको बंगलादेशले पारीको दोश्रो बलमै फर्ममा रहेका ओपनर तामिम इकबाललाई गुमाएको थियो। एक समय ३३/४को स्थितिमा रहेको बंगलादेश हारतर्फ उन्मुख देखिएको थियो। तर मध्यक्रममा २ ब्याट्सम्यानले शतकीय पारी खेल्दै उत्कृष्ट साझेदारी गरेपछि बंगलादेशले जित हात पार्यो। शकिबले १ सय १५ बलमा ११ चौका र १ छक्काको मद्दतले १ सय १४ रन जोडे भने महमुदुल्लाहले १ सय २ रन बनाए।

न्युजिल्यान्डका टिम सौथीले शीर्ष ३ ब्याट्सम्यानलाई सस्तैमा पेभेलियन फर्काउँदै खेलमा न्युजिल्यान्डलाई अग्रस्थानमा राखेका थिए। ट्रेन्ट बोल्ट र एडम मिल्नले १/१ विकेट लिए। बंगलादेशले १६ बल बाँकी छदै खेल जितेको थियो।

यसअघि पहिलो ब्याटिङ गरेको न्युजिल्यान्डले ५० ओभरमा ८ विकेट गुमाउँदै २ सय ६५ रन जोडेको थियो। केन विलियमसन र रस टेलरले अर्धशतक बनाउँदै न्युजिल्यान्डको पारी सम्हालेका थिए। कप्तान विलियमसनले ५७ रङ बनाए भने टेलरले ६३ रङ जोडे। निल ब्रुम्ले ३६, मार्टिन गप्तिलले ३३ र जेमी निसामले २३ रनको योगदान दिए।

बंगलादेशका लागि मोसाड्डेक होसेनले ३ विकेट लिए भने तस्किन अहमदले २ विकेट हात पारे।