काठमाडौं (हाम्रो खेलकुद) । विभागीय टोली नेपाल पुलिस क्लब राजधानीमा जारी प्रथम प्रधानमन्त्री कप एक दिवसीय पुरुष राष्ट्रिय क्रिकेट प्रतियोगिताको फाइनलमा प्रवेश गरेको छ ।

त्रिवि क्रिकेट मैदानमा वर्षाले प्रभावित बनेको खेलमा अर्को विभागीय टोली नेपाल एपिएफ क्लबलाई डगवर्थ लुईस पद्दतिका आधारमा ३४ रनले पराजित गर्दै पुलिस उपाधिनजिक पुगेको हो ।

पुलिसले दिएको २ सय ५३ रनको लक्ष्य पछ्याएको एपिएफले २८.३ ओभरमा ६ विकेट गुमाएर १ सय ३८ रन बनाएर खेलिरहेको अवस्थामा वर्षा भएपछि खेल रोकिएको थियो । त्यसपछि एफिएफले २८.३ ओभरमा १ सय ७३ रनको लक्ष्य पाएको थियो । नयाँ लक्ष्य पाउनु अघि नै एपिएफले निर्धारित ओभर खेल्दै १ सय ३८ रन बनाएको थियो ।

त्यसअघि एपिएफका कप्तान ज्ञानेन्द्र मल्लले सर्वाधि ४५ रन बनाएका थिए । सन्दिप सुनार ३६ रनमा आउट हुदा पृथु बास्कोटा १९ रनमा पभेलियन फर्किए । ओपनर सुवास खकुरेल १७ तथा आसिफ शेख १६ रनमा आउट भए । पुलिसका ललित राजवंशीले तीन तथा सुशिल कंडेलले एक विकेट लिए ।

यसअघि टस हारेर पहिले ब्याटिङको निम्तो पाएको पुलिसले निर्धारित ५० ओभरमा ९ विकेट गुमाएर २ सय ५२ रनको योगफल तयार पारेको थियो । पुलिसका लागि म्यान अफ द म्याच कुशल भुर्तेलले ५२ रनको अर्धशतकीय इनिङ्स खेले । यस्तै सिद्धान्त लोहनीले ४०, दिपेन्द्र सिंह ऐरी ३७ रनमा आउृट भए ।

ओपनर सुनिल धमला र अमित श्रेष्ठले समान २६–२६ रन बनाएर आउट भए । कप्तान मञ्जित श्रेष्ठ २२ रन बनाएर आउछ हुदा दिलीपनाथ १३ रनमा पभेलियन फर्किए । एपिएफका अनिल कुमार शाहले तीन विकेट लिए । ज्ञानेन्द्र मल्ल र अरुन ऐरीले समान दुई–दुई तथा भुवन कार्की र अविनाश बोहराले समान एक–एक विकेट लिए ।

प्रतियोगिता अन्र्तगत दोस्रो सेमिफाइनलमा आर्मीले पश्चिमाञ्चलको सामना गर्नेृछ ।