काठमाडौं (हाम्रो खेलकुद) – वर्षाका कारण दोस्रो इनिङ्स शुरु हुन नसकेपछि मध्यमाञ्चल र मध्यपश्चिमाञ्चलले प्रधानमन्त्रीकप एक दिवसीय क्रिकेटमा अंक बाँडेका छन् । कीर्तिपुरस्थित त्रिवि क्रिकेट मैदानमा मंगलबार समूह ‘ए’ को मध्यपश्चिमाञ्चल र मध्यमाञ्चलबीचको खेल पुनः शुरु हुन नसक्दा अंक बाड्न बाध्य भएका हुन् ।

मध्यपश्चिमाञ्चलले दिएको १ सय २४ रनको लक्ष्य पछ्याएको मध्यमाञ्चलले लक्ष्य पछ्याइरहँदा वर्षा भएपछि खेल रोकिएको थियो । मध्यमाञ्चलले ४.२ ओभरमा एक विकेट गुमाएर २३ रन बनाएर खेलिरहेको थियो । हरिशंकर शाहलाई शुन्य रनमा गुमाएको मध्यमाञ्चलको इनिङ्स ओपनर भुपेन्द्र थापा र सोनु तामाङले सम्हालेका थिए । भुपेन्द्र १० तथा सोनु ११ रनमा क्रिजमा थिए । त्यसपछि खेल सुचारु हुन नसक्दा खेल बराबरीमा सकिएको हो । मध्यपश्चिमका सिद्धान्तराज शाहीले एक विकेट लिएका थिए ।

यसअघि टस जितेर पहिले ब्याटिङ गरेको मध्यपश्चिम ४३.२ ओभरमा १ सय २३ रनमा अलआउट भएको थियो । खराव शुरुवात गरेको मध्यपश्चिमको इनिङ्स मध्यक्रमका राजवीर सिंह र प्रनित थापामगरले सम्हाल्दै सम्मानजनक योगफलमा पुर्याएको थियो । राजवीर ६३ रनमा बोल्ड हुदा प्रनित २० रनमा रनआउट भए । त्यसपछि ब्याटिङमा आएका अमर सिंह राउटेलाले १० रन बनाए । ओपनर सुवेन्दु पाण्डे ८ रनमा आउट हुदा चार ब्याट्सम्यानले रनको खाता खोल्न सकेन । मध्यपश्चिमलाई सस्तैमा समेट्न मध्यमाञ्चलका किशोर महतो एक्लैले चार विकेट लिए । हरिशंकर शाहले दुई तथा रसिद खान र रामसद अलामले एक–एक विकेट हात पारे ।

प्रतियोगितामा तीन विभागीयसहित सहभागी आठ टिमको सहभागिता रहेको छ । समूह ‘ए’ मा नेपाल एपिएफ क्लब, मध्यमाञ्चल बिकास श्रेत्र, मध्यपश्चिमाञ्चल बिकास क्षेत्र र पश्चिमाञ्चल बिकास क्षेत्र रहेका छन् यस्तै समूह ‘बी’ मा त्रिभुवन आर्मी क्लब, नेपाल पुलिस क्लब, पूर्वाञ्चल बिकास क्षेत्र र सुदुरपश्चिमाञ्चल बिकास क्षेत्र रहेका छन् । समूह ‘बी’ बाट आर्मी र पुलिस सेमिफाइनलमा प्रवेश गरिसकेका छन्। प्रतियोगिताको विजेताले २० लाख तथा उपविजेताले १० लाख रुपैयाँ पुरस्कार पाउनेछन् । त्यस्तै सेमिफाइनलमा पुग्ने टोलीले ५० हजार र प्रत्येक लिग खेलमा जित्ने टोलीले २५ हजार रुपैयाँ पुरस्कार पाउनेछन् । यस्तै प्रतियोगिताको म्यान अफ दी सिरिजले एक लाख रुपैया र उत्कृष्ट ब्याट्सम्यान र बलरले समान ५०–५० हजार रुपैयाँ पुरस्कार पाउनेछन् ।

प्रतियोगिता अन्तर्गत बुधबार मध्यमाञ्चल र पश्चिमाञ्चलबीच खेल हुनेछ ।