काठमाडौं (हाम्रो खेलकुद) – विभागीय टोली नेपाल एपिएफ क्लबले राजधानीमा जारी प्रधानमन्त्रीकप एकदिवसीय पुरुष राष्ट्रिय क्रिकेट प्रतियोगितामा विजयी शुरुवात गरेको छ । प्रतियोगिता अन्तर्गत सोमबारबाट शुरु भएको समूह ‘ए’ को खेलमा पश्चिमाञ्चललाई डिएल (डकवर्थ लुइस) नियमको आधारमा १६ रनले पराजित गर्दै विजयी शुरुवात गरेको हो ।

एपिएफले ३७ ओभरमा ४ विकेट गुमाएर १ सय ६० रन बनाएर खेलिरहेको अवस्थामा वर्षा भएपछि खेल रोकिएको थियो। त्यसपछि पश्चिमाञ्चलले २० ओभरमा १ सय ४८ रनको नयाँ लक्ष्य पायो। जवाफी ब्याटिङ गरेको पश्चिमाञ्चलले निर्धारित २० ओभरमा ६ विकेट गुमाएर १ सय ३१ रन बनायो। मध्यक्रममा ब्याटिङमा आएका पश्चिमाञ्चलका सौरभ खनाले विस्फोटक ब्याटिङ गरेपनि टिमलाई जित दिलाउन सकेनन्। ४९ बलको सामना गरेका सौरभले ३ चौका र ११ छक्काको मद्दतले अविजित ९० रन जोडेका थिए। उनलाई अन्य ब्याट्सम्यानहरुले साथ दिन नसक्दा पश्चिमाञ्चल पहिलो खेलमा पराजित हुन पुग्यो। खेलमा पश्चिमाञ्चलका अन्य कुनै ब्याट्सम्यानले दोहोरो अंकमा रन बनाउन सकेनन्। एपिएफका कप्तान ज्ञानेन्द्र मल्लले तीन विकेट लिए । सन्दिप जोरा, अविनाश बोहोरा र भुवन कार्कीको नाममा समान एक–एक विकेट रह्यो।

अर्धशतक प्रहार गरेपछि सौरभ खनाल

यसअघि त्रिवि क्रिकेट मैदान कीर्तिपुरमा टस हारेर पहिले ब्याटिङको निम्तो पाएको एपिएफले ३७ ओभरमा ४ विकेट गुमाएर १ सय ६० रन बनाएको थियो । त्यसैबेला पानी परेपछि खेल पुन सुरु हुन सकेन । एपिएफका ओपनर सुवास खकुरेलले ५० रनको अर्धशतकीय इनिङ्स खेले । प्रदिप ऐरी ४५ रन तथा कप्तान ज्ञानेन्द्र मल्ल ३३ रनमा अविजित रहे । आशिफ शेख १९ रनमा आउट भए । पश्त्रिमाञ्चलका लाल अधिकारीले दुई तथा धिरज शाही र विपिन खत्रीले समान एक–एक विकेट हात पारे ।

आक्रमक ब्याटिङ गरेका पश्चिमका सौरभ खनाल म्यान अफ द म्याच भए। उनले नगद रु. ५ हजार सँगै ट्रफी हात पारे।

प्रतियोगिता अन्र्तगत मंगलबार समूह ‘ए’ कै मध्यमाञ्चल र मध्यपश्चिमाञ्चलबीच खेल हुनेछ ।