धनगढी (हाम्रो खेलकुद) – धनगढीमा जारी डिसिए अन्तर विद्यालय क्रिकेट प्रतियोगितामा बिहीबार धनगढीको ग्ली एकेडेमी र इमरेड एकेडेमी विजयी भएका छन् ।

पहिलो खेलमा ज्ञान निकेतनलाई २० रनले हराउँदै ग्ली एकेडेमी अगाडि बढेको छ । धनगढीको फाप्ला खेल मैदानमा टस जितेर पहिले व्याटिङ गरेको ग्लीले निर्धारित २० ओभरमा ६ विकेट गुमाउँदै १ सय १६ रन बनायो । टोलीका पदम बोहरा अर्धशतक बनाए । पदमले ५२ तथा विशाल भट्टले १३ रन बनाए ।

ज्ञान निकेतनका विक्रम खत्रीले १ विकेट लिए । ग्लीका ५ ब्याट्सम्यान रन आउट भएका थिए ।  ज्ञान निकेतनले ३८ अतिरिक्त रन दिएको थियो । १ सय १७ रन को लक्ष्य पछ्याएकोे ज्ञान निकेतन १६.२ ओभरमा ९६ रनमा सिमित भएको थियो ।

टोलीका आदित्य शाहले ११ रन र पारस देउवाले १० रन बनाउनु बाहेक अरु खेलाडीको खराब रह्यो । ज्ञान निकेतन लाई लक्ष्यमा पुग्न नदिन ग्लीका पदम बोहराले ५ र सविन जोशीले २ विकेट लिए । ५२ रन बनाएका ग्लीका पदम म्यान अफ दी म्याच चुनिए ।

दोश्रो खेलमा इमरेड एकेडेमीले मयुर स्कुललाई ८ रनको झिनो अन्तरले हरायो । टस जितेर व्याटिङ गरेको इमरेडले २० ओभरमा ५ विकेट गुमाउदै १ सय १६ रन बनायो । टोलीका रोहित सिंहले अविजित ४१, हिमासु चन्दले १६, विवेक बयलकोटी १० रन बनाए । बलिङमा मयुरका दिपेश रावल र साहील कायस्थले समान १ विकेट लिए ।

१ सय १७ रनको लक्ष्य लिएर उत्रिएको मयुरले १७.३ ओभरमा १ सय ८ रनमा सिमित भएको थियो । मयुरका लागी दिपेन्द्र शर्माले ३५, जंग साउद र रोशन रावतले समान १७ रन बनाए । बलिङमा इमरेडका भुपेश ओझा, अजय महरा र सुनील भण्डारीले समान २ विकेट लिए । ४१ रन बनाएका रोहित म्यान अफ दी म्याच घोषित भए ।