काठमाडौँ (हाम्रो खेलकुद) – नेपाल क्रिकेट स्कुल र भारतीय टोली पयाडे स्पोर्ट्स क्लब, मुम्बईबीच जारी यु-१४ द्विपक्षीय होम एण्ड अवे वान डे सिरिज २०१७ अन्तर्गत पहिलो एकदिवसीय खेलमा नेपाली टोली पराजित भएको छ।

नेपाल क्रिकेट स्कुलका खेलाडी

किर्तिपुर स्थित टि.यु. अन्तराष्ट्रिय क्रिकेट मैदानमा टस जितेर फिल्डीङ रोजेको भारतीय टोलीले उत्कृष्ट बलिङ प्रदर्शन गर्दै नेपाली टोलीलाई ८९ रनमा अलआउट गरेको थियो। ३४ ओभर ब्याटिङ गरेको नेपाली टोलीका लागि शिशिर भुजेलले ५६ बलमा ३२ रन जोडे भने विश्वन्त बरालले ३५ बलमा १७ रन बनाए। अन्य कुनै ब्याट्सम्यानले दोहोरो अंकमा रन बनाउन नसकेपछि नेपाली टोली सस्तैमा समेटिएको थियो। बलिङतर्फ भारतका समय जिगेश व्यासले ६ ओभर बलिङ गर्दै २ मेडनका साथ १५ रन खर्चेर ३ विकेट लिए। उनि खेलको म्यान अफ द म्याच घोषित भए।

जवाफी ब्याटिङमा उत्रिएको भारतीय टोलीले पनि सोचेअनुरुपको सुरुवात गर्न सकेन। सुरुवातमै लगातार विकेट गुमाएको टोलीलाई विनित यादव र राज केतन साहको अविजित साझेदारीले जिततर्फ डोर्याएको थियो। ६ विकेट खसिसकेको अवस्थामा क्रिजमा जमेको जोडीले २४औं ओभरमै जित दिलाएको थियो। विनितले ४ चौकको मद्दतले ४६ बलमा अविजित ३५ रन बनाए। राज केतनले धैर्यतापुर्वक पारी खेल्दै ३४ बलमा १८ रन जोडे।

नेपालका लागि अथर्व पौडेलले २५ रन खर्चेर ३ विकेट लिएका थिए भने आयुष बनियाको नाममा २ विकेट रह्यो।

३ एकदिवसीय शृंखला अन्तर्गतको दोश्रो खेल भोलि हुनेछ। यसअघि यी दुइ टोलीबीच केहि दिन अघि भएको टि-२० शृंखलामा नेपाल ४-१ले विजयी रहेको थियो।