मोहाली (एजेन्सी) – इन्डियन प्रिमियर लिग अन्तर्गत मंगलबार भएको खेलमा किङ्गस इलेभेन पन्जाबले कोलकाता नाइट राइडर्सलाई १४ रनले पराजित गर्दै प्लेअफ पुग्ने सम्भावनालाई जिवितै राखेको छ।

टस हारेपछि ब्याटिङमा उत्रिएको पन्जाबले निर्धारित २० ओभरमा ६ विकेट गुमाउँदै १ सय ६७ रन बनाएको थियो। कप्तान ग्लेन म्याक्स्वेलले आक्रामक ब्याटिङ गर्दै २५ बलमा १ चौका र ४ छक्काको मद्दतले ४४ रन जोडेका थिए भने रिधिमान साहले ३३ बलमा ३८ रन जोड्दै साथ दिए। मनन वोहराले १५ बलमा ४ चौकाको मद्दतले २५ रन बनाएका थिए। कोलकाताका कुलदिप यादव र क्रिस वोक्सले २/२ विकेट लिए।

जवाफी ब्याटिङमा उत्रिएको कोलकाताले राम्रो सुरुवात पाएपनि मध्यक्रमको ब्याटिङ नचलेपछि हारको सामना गर्नुपर्यो। ओपनर सुनिल नारायणले १० बलमा १८ रन जोडे भने अर्का ओपनर क्रिस लिनले ५२ बलमा ८४ रनको उत्कृष्ट पारी खेले। १८औं ओभरमा रनआउट हुनु अघि लिनले ८ चौका र ३ छक्का प्रहार गरेका थिए। राहुल टेवाटियाले एकै ओभरमा गम्भीर र उथाप्पाको विकेट लिएपछि कोलकाताको पकड खुस्किएको थियो। कोलकाताले २० ओभरमा १ सय ५३ रन मात्र जोडेको थियो। पन्जाबका लागि टेवाटिया र मोहित शर्माले समान २/२ विकेट लिए।