धनगढी (हाम्रो खेलकुद) – कैलालीको अत्तरीयामा जारी रुस्लान अत्तरीया कपमा विभागीय टोली एपिएफ उपाधि नजिक पुगेको छ ।

सोमवार भएको पहिलो सेमिफाईनलमा कैलाली जिल्ला क्रिकेट एकेडेमीलाई ८२ रनले हराउदै एपिएफ उपाधि नजिक पुगेको हो । अत्तरीया स्थित एपिएफको खेल मैदानमा भएको खेलमा टस जितेर पहिले व्याटिङ गर्दै एपिएफले निर्धारित २० ओभरमा ५ विकेट क्षतीमा १५० रन वनायो । टीमका लागि करुणा भण्डारीले ४२ रनको पारी खेलिन् । २९ वलको सामना गर्दै उनले एक छक्का र ६ चौका प्रहार गरिन् । टीमका लागि १५ वल खेल्दै ३ चौकाको मदत्तले विनु वुढामगरले २१ रन र ममता चौधरीले १५ रन वनाईन् । दोस्रो विकेटका लागि ज्योती र सरीता मगरले ३२ रनको, तेस्रो विकेटका लागि ज्योती र करुणाले ३५ रनको तथा करुणा र ममताले चौथो विकेटका लागि २९ रनको महत्वपुर्ण साझेदारी गरे । कैलाली जिल्ला क्रिकेट एकेडेमीका लागि कविता कुवरले ३ विकेट लिईन । ४ ओभर बलिङ गरेकी उनले २३ रन खर्चिन । यस्तै अञ्जली चन्द र लक्ष्मी साउदले एक एक विकेट लिईन । ३ ओभर वलिग गरेकी लक्ष्मीले ३३ रन खर्चिन । कैलालीका लागि सुमन विष्टको वलिग भारी भयो । एक ओभरमा २३ रन दिएकी उनले आफुले गरेको ४ ओभरमा ४७ रन खर्चिन ।

एक सय ५१ रनको विजय लक्ष्य लिएर मैदान उत्रिएको कैलाली जिल्ला क्रिकेट एकेडेमी ६८ रनमा समेटियो । टोलीका लागि नितु भण्डारीले १७ रन जोड्नु वाहेक अन्य खेलाडीले दोहोरो रन वनाउन सकेनन् । एपिएफको कसिलो वलिग सामु कैलालीका खेलाडी निरीह देखिए । एपिएफको जितमा विनु वुढामगरले ३ विकेट लिईन । सरीता मगर र सीता रानामगरले दूई दुई विकेट लिए भने करुणा भण्डारी र रितु कनौजीयाले एक एक विकेट लिए । खेलमा उत्कृष्ट प्रदर्शन गरेकी एपिएफकी कप्तान विनु वुढामगर वुमन अफ द म्याच भईन् । उनले नगद ३ हजार हात पारिन् । त्यस्तै खेलमा एक एक छक्का प्रहार गरेकी एफिएफकी करुणा भण्डारी र ईन्दु वर्माले नगद पाच पाच सय प्राप्त गरिन् ।