एजेन्सी – इन्डियन प्रिमिएर लिग अन्तर्गत मंगलबार भएको खेलमा दिल्ली डेयरडेभिल्सले सनराइजर्स हैदराबादलाई ६ विकेटले पराजित गरेको छ।

पहिलो ब्याटिङ गरेको हैदराबादले राखेको १ सय ८६ रनको लक्ष्यलाई ५ बल खेल्न बाँकी रहँदै दिल्लीले ४ विकेटको क्षतिमा पुरा गरेर जित हासील गरेको थियो।

दिल्लीका लागि ओपनर सञ्जु स्यामसनले २४, करुण नायरले २० बलमा ३९, ऋषव पन्तले ३४ रन र श्रेयस एैयरले २५ बलमा ३३ बनाएका थिए। यसबाहेक कोरी एन्डर्सन २४ बलमा अविजित ४१ तथा मोरिसले १५ रनमा अविजित रहेका थिए। मोहम्मद सिराजले २ तथा भुवनेश्वर कुमारले १ विकेट लिएका थिए।

यसअघि पारीको अनत्यतिर युवराज सिंहको ब्याटिङ चलेपछि हैदराबादले ३ विकेटको क्षतिमा १ सय ८५ रन बनाएको थियो। उनले ४१ बलमा १ छक्का र ११ चौकाको सहयोगले अविजित ७० रन बनाएका थिए।

कप्तान डेभिड वार्नर (३०), शिखर धवन (२८) र केन विलियम्सन (२४) ९२ रनको योगफलमा आउट भइसकेको स्थितिमा युवराजले बिस्फोटक ब्याटिङ गरेका थिए। उनले मोएसिस हेनरिकेस (२५) सँग मिलेर चौथो विकेटका लागि पछिल्लो ५० बलमा अविजित ९३ रन बनाएका थिए।

वार्नर र केन विलियम्सनलाई आउट गरेका मोहम्मद सामी खेलको म्यान अफ दि म्याच घोषित भए।