पुने (एजेन्सी) – रोयल च्यालेन्जर्स बेंगलोरले लगातार खेलमा खराब ब्याटिङ प्रदर्शन गरेपछि इन्डियन प्रिमिएर लिग अन्तर्गत यस सिजनको प्लेअफमा नपुग्ने पक्का भएको छ। शनिबार राइजिङ पुने सुपरजाएन्ट्स विरुद्धको खेलमा १ सय ५८ रनको लक्ष्य पछ्याएको बेंगलोरले निर्धारित २० ओभर खेल्दै ९ विकेटको क्षतिमा ९६ रनमात्र जोड्न सफल रह्यो।

बेंगलोरका लागि ओपनारका रुपमा ब्याटिङ गरेका कप्तान विराट कोहलीले ५५ रन बनाएका थिए। उनले ४८ बल खेल्दै ४ चौका र १ छक्का प्रहार गरेका थिए। कोहली बाहेक अन्य कुनै ब्याट्सम्यानले दोहोरो अंक छुन सकेनन्। एबी डी भिलिएर्सले ३ रन मात्र जोडे भने ट्राभिस हेड (२) र केदार जाधव (७)ले समर्थकहरुलाई निराश पारे। पुनेका लागि इमरान ताहिरले ३ विकेट लिए भने लकी फर्गुसनले ४ ओभरमा ७ रन खर्चेर २ विकेट आफ्नो नाम गरे। उत्कृष्ट बलिङ प्रदर्शन गरेका फर्गुसन म्यान अफ द म्याच भए।

यसअघी पहिलो ब्याटिङ गरेको पुनेले २० ओभरमा ३ विकेटको नोक्सानीमा १ सय ५७ रन जोड्यो। उसका लागि फर्ममा रहेका ओपनर राहुल त्रिपाठीले २८ बलमा ३७ रन जोडे भने कप्तान स्टिभन स्मिथले ३२ बलमा ४५ रन बनाए। ओपनर अजिंक्या रहाने ६ रन बनाऊँदै आउट भए। मनोज तिवारीले अविजित ४४ रन जोडे भने महेन्द्र सिंह धोनी पनि २१ रनमा अविजित रहे। बेंगलोरका लागि स्टुअर्ट बिनि, पवन नेगी र स्यामुएल बद्रिले १/१ विकेट लिएका थिए।