बेंगलोर (एजेन्सी) – इन्डियन प्रिमियर लिग अन्तर्गत बिहिबार राती भएको खेलमा गुजरात लायन्सले रोयल च्यालेन्जर्स बेंगलोरलाई ७ विकेटले पराजित गरेको छ।

पछिल्लो खेलमा खराब ब्याटिङ प्रदर्शन गर्दै ४९ रनमा अलआउट भेएको बेंगलोरले यस खेलमा पनि खासै राम्रो प्रदर्शन गर्न सकेन। निर्धारित २० ओभरमा सबै विकेट गुमाउनुअघि उसले १ सय ३४ रनमात्र जोड्न सक्यो। लगातारको खेलमा शीर्षक्रमको ब्याटिङ चल्न नसकेपछि मध्यक्रमका ब्याट्सम्यानले टोलीलाई सम्मानजनक योगफलतर्फ डोर्याएका थिए। बेंगलोरका लागि पवन नेगीले ३२ रन बनाए भने केदार जाधवले ३१ रन जोडेका थिए। गेल (८), कोहली (१०) र डि भिलिएर्स (५)ले फेरी निराश बनाएका थिए।

गुजरातका लागि एन्ड्रयु टाईले उत्कृृष्ट बलिङ गर्दै ४ ओभरमा १२ रनमात्र खर्चेर ३ विकेट लिए। रविन्द्र जडेजाले २ विकेट लिए भने अंकित सोनी, जेम्स फक्नर र बसिल थम्पीको नाममा पनि १/१ विकेट रह्यो।

जवाफि ब्याटिङमा उत्रिएको गुजरातले आफ्ना दुवै ओपनरलाई चाँडै गुमाएपनि तेश्रो विकेटको साझेदारीले खेलमा पकड बनाएको थियो। कप्तान सुरेश रैना र आरोन फिन्चले ९२ रनको साझेदारी गरेपछि टोलीले सहज जित हात पारेको थियो। रैनाले ३० बलमा अविजित ३४ रन बनाए भने फिन्चले ३४ बलमा ५ चौका र ६ छक्काको मद्दतले ७२ रन जोडेका थिए। गुजरातले १४औं ओभरको पाँचौ बलमा ३ विकेटको क्षतिमा लक्ष्य पुरा गर्यो।

बेंगलोरका स्यामुएल बद्रीले २ विकेट लिए भने पवन नेगीको नाममा १ विकेट रह्यो। गुजरातका लागि उत्कृष्ट बलिङ गरेका टाई म्यान अफ द म्याच भए।