राजकोट (एजेन्सी) – इन्डियन प्रिमियर लिग अन्तर्गतको खेलमा किङ्ग ११ पन्जाबले गुजरात लायन्सलाई २६ रनले पराजित गरेको छ  । हासिल आम्लाको उच्च प्रदर्शन जारि रहदा पन्जाबले प्रतियोगितामा तेस्रो जित निकाल्दै अंक तालिकाको चौथो स्थानमा पुगेको हो ।

टस हारेर पहिले ब्याटिंग गरेको पन्जाबले निर्धारित २० ओभरमा ७ विकेट गुमाउदै १८८ रन बनाएको थियो । अघिल्लो खेलमा शतक बनाएका हासिम आमलाले ४० बलको सामना गर्दै ६५ रन बनाएका थिए । त्यस्तै सन मार्सले ३० तथा ग्लेन म्याक्सवेलले ३१ रनको योगदान दिए ।

गुजरातकालागि एन्ड्रेउ टाईले २ विकेट लिए भने सुभम अग्रवाल, नाथु सिंह, रबिन्द्र जडेजा र ड्वैन स्मिथले समान १-१ विकेट लिए ।

दोस्रो ईनिंगमा १८९ रनको लक्ष्य पछ्याएको गुजरातले निर्धारित ओभरमा ७ विकेट गुमाउदै १६२ रन मात्र बनाउन सफल भयो । पहिलो ओभरको अन्तिम बलमा आफ्नो महत्वपूर्ण ब्याट्सम्यान ब्रेन्डेन म्याकलमलाई गुमाएपछि दबाबमा आएको गुजरातकालागि दिनेश कार्तिकको ४४ बलमा ५५ रन बनाएपनि उनलाई सुरेश रैना ३२ र एन्ड्रेउ टाई(२२) बाहेक कसैले साथ् दिएन ।

पन्जाबका अक्सर पटेल , कसी करिप्पा र सन्दिप शर्माले २ विकेट लिए भने मोहित शर्माले १ विकेट लिए । हासिम आमला खेलको म्यान अफ द म्याच भए ।