धनगढी (हाम्रो खेलकुद) – धनगढी प्रिमिएर लिगको दोश्रो क्वालिफायरमा पहिलो ब्याटिङ गरेको टिम चौराहा धनगढीले रुपन्देही च्यालेन्जर्ससामु १ सय ७३ रनको लक्ष्य प्रस्तुत गरेको छ।

कप्तान पारस खड्काको कप्तानी पारीको मद्दतले टिम चौराहा धनगढीले निर्धारित २० ओभरमा ५ विकेट गुमाऊँदै १ सय ७२ रनको योगफल खडा गरेको थियो। खड्काले ४१ बलमा अविजित ६७ रन बनाऊँदै प्रतियोगिताकै सर्वाधिक व्यक्तिगत स्कोर बनाए। ओपनर राजु रिजाल र अनिल कुमार मण्डलले राम्रो सुरुवात दिलाएर ठुलो स्कोरको लागि आधार तय गरेका थिए। मण्डलले ११ बलमा १३ रन बनाए भने राजुले २८ बलमा २५ रन जोडे। पृथु बास्कोटा र आरीफ शेख क्रमश: ४ र ७ रन बनाऊँदै आउट भएपनि कप्तान खड्काले आफ्नो तर्फबाट लगातार रन बनाइरहेका थिए।

३२ बलमा अर्धशतक पुरा गरेका पारसले आफ्नो पारीमा ६ चौका र ४ छक्का प्रहार गरेका थिए। उनले छैठौं विकेटका लागि सौरभ खनालसंग १९ बलमा अविजित ४३ रन बनाएका थिए। सौरभले ८ बलमा २ चौका र २ छक्काको मद्दतले २४ रन जोडे। अमर सिंह राउटेलाले पनि १२ बलमा ३ चौकाको सहायताले १६ रन बनाएका थिए।

रुपन्देहीका बलरहरुले राम्रो प्रदर्शन गर्न नसक्दा चौराहाका ब्याट्सम्यानले खुलेर रन बनाएका थिए। कृष्ण कार्कीले २ विकेट लिन ४० रन खर्चे भने बिक्रम भुसाल र साहब आलमले पनि १/१ विकेट लिए।

यस खेलमा जित हात पर्ने टोलीले फाइनल खेलमा बिराटनगर किङ्सको सामना गर्नेछ।