धनगढी (हाम्रो खेलकुद)– विराटनगर किङ्ग सगरमाथा सिमेन्ट डिपिएल क्रिकेटको फाइनल पुगेको छ। रुपन्देही च्यालेन्जर्सलाई क्वालिफायर्स बुधबार २९ रनले हराउँदै शरद भेषावकरको कप्तानीमा रहेको विराटनगर उपाधि नजिक पुगेको हो।

विराटनगर फाइनलमा पुग्ने पहिलो टोली बनेको छ । फाइनल पुग्ने अर्को टोली टुंगो भोलीमात्र लाग्नेछ । फाइनल पुग्नका लागि रुपन्देहीसँग अर्को एउटा मौका रहेको छ । धनगढी टिम चौरहा र काठमाडौं गोल्डेन्सबीचको आज भइरहेको एलिमिनेटर खेलको विजेतासँग रुपन्देहीले बिहीबार प्रतिस्पर्धा गर्नेछ ।

सेती अन्चल प्रहरी कार्यालयको मैदानमा १ सय २९ रनको लक्ष्य पछ्याएको शक्ति गौचनको रुपन्देहीले २० ओभरमा सबै विकेट गुमाएर ९९ रनमात्र बनाउ सक्यो । रुपन्देहीका लागि विक्रम सोब २३ र पुष्प थापाले २२ रन बनाउनु बाहेक कुनै खेलाडीले दोहोरो अंकमा रन जोड्न सकेनन् । रुपन्देहीलाई सय रनभन्दा कममा रोक्ने क्रममा विराटनगरका सुशिल कडेले ४ विकेटछ लिए । ४ ओभर बलिङ गरेका उनले १ मेडनसहित १५रन खर्चेर ४ विकेट लिएका थिए । त्यस्तै सन्दीप लामिछानेले २, प्रकाश विष्ट, दीपेन्द्रसिंह ऐरी, जितेन्द्र मुखिया र पवन सर्राफले समान १ विकेट लिए ।

त्यसअघि टस जितेर ब्याटिङ गरेको विराटनगरले २० ओभरमा ९ विकेट गुमाएर १ सय २८ रन बनाएको थियो । टोलीका लागि सबैभन्दा बढी आसिफ शेखले ३६, कप्तान शरदले २४, पवनले १५ र दीपेन्द्र सिंहले १३ रन बनाएका थिए । आसिफले ४१ बल खेल्दै ३ चौका र २ छक्का प्रहार गरेका थितए । शरदले २२ बलमा २ छक्का प्रहार गरे । लिग चरणमा ५ मध्ये ४ खेल जितेको रुपन्देहीको प्रदर्शन आजको खेलमा भने कमजोर रह्यो ।

लिग चरण अन्तिम खेलमा रुपन्देही पारस खड्काको नेतृत्वमा रहेको टिम चौरहासँग पराजित भएको थियो । रुपन्देही लिग चरणमा भने विराटनगरलाई हराएको थियो ।